ఐఎస్‌ఎస్‌ఎఫ్ జూనియర్ వరల్డ్ కప్‌లో భారత్‌కు పతకాలు

కైరోలో జరుగుతున్న ఐఎస్‌ఎస్‌ఎఫ్ జూనియర్ వరల్డ్ కప్‌లో భారత షూటర్లు అద్భుత ప్రదర్శన కనబరిచారు. 10 మీటర్ల ఎయిర్ రైఫిల్ మిక్స్‌డ్ ఈవెంట్‌లో శాంభవీ క్షీరసాగర్, దివ్యాన్షు దేవాంగన్ జోడీ ప్రపంచ రికార్డ్ స్కోరుతో స్వర్ణ పతకం సాధించింది. ఫైనల్లో ఈ జోడీ 499.9 పాయింట్లు సాధించి విజేతలుగా నిలిచింది.

చైనీస్ తైపీ జోడీ సాయ్ చీ, చెన్ యు రజత పతకం గెలుచుకోగా, ఫ్రాన్స్ జట్టుకు కాంస్య పతకం దక్కింది. ఈ విజయంతో టోర్నమెంట్‌లో భారత్ నాలుగో స్వర్ణ పతకాన్ని అందుకుంది. మొత్తం నాలుగు స్వర్ణాలు, ఐదు రజతాలు, మూడు కాంస్యాలతో 12 పతకాలు సాధించి భారత్ అగ్రస్థానంలో కొనసాగుతోంది.