హెచ్‌-1బీ వీసాల జారీ లో యూఎస్ మార్పులు , స్కిల్స్ కు ప్రాధాన్యం!

అమెరికా హెచ్‌-1బీ వీసాల జారీ విధానంలో కీలక మార్పులు తీసుకురావడానికి సిద్ధమైంది. ఇప్పటివరకు అమలులో ఉన్న ర్యాండమ్ లాటరీ విధానాన్ని తొలగించి, అధిక నైపుణ్యాలు మరియు ఎక్కువ వేతనాలు పొందే అభ్యర్థులకు ప్రాధాన్యం ఇచ్చే కొత్త విధానాన్ని ప్రవేశపెట్టాలని నిర్ణయించింది.

ఈ విషయాన్ని అమెరికా Department of Homeland Security (డీహెచ్‌ఎస్‌) మంగళవారం అధికారిక ప్రకటన ద్వారా వెల్లడించింది. కొత్త నిబంధనలు వచ్చే ఏడాది ఫిబ్రవరి 27 నుంచి అమల్లోకి వస్తాయని, అలాగే 2027 ఆర్థిక సంవత్సరానికి సంబంధించిన హెచ్‌-1బీ క్యాప్ రిజిస్ట్రేషన్ సీజన్‌కూ ఇవే వర్తిస్తాయని స్పష్టం చేసింది.

అమెరికా దేశీయ కార్మికుల ఉద్యోగ అవకాశాలు, పని పరిస్థితులు, వేతనాలను కాపాడటమే ఈ మార్పుల ప్రధాన లక్ష్యమని డీహెచ్‌ఎస్‌ తెలిపింది. ప్రస్తుత లాటరీ విధానాన్ని కొంతమంది సంస్థలు దుర్వినియోగం చేస్తూ, విదేశాల నుంచి తక్కువ వేతనాలకు ఉద్యోగులను నియమించుకుంటున్నాయని పేర్కొంది. ఈ పరిస్థితికి అడ్డుకట్ట వేసేందుకే నూతన విధానాన్ని తీసుకొస్తున్నట్లు వెల్లడించింది.

ఈ మార్పులతో హెచ్‌-1బీ వీసాల జారీ ప్రక్రియ మరింత నైపుణ్యాధారితంగా మారనుందని నిపుణులు అభిప్రాయపడుతున్నారు.