కొత్త కార్లకు బదులు ప్రీ-ఓన్డ్‌ లగ్జరీ కార్ల వైపు యువత మొగ్గు

విలాసవంతమైన కారును కొనుగోలు చేయాలంటే కొత్తదే కావాలన్న అభిప్రాయం మారుతోంది. పెరుగుతున్న కొత్త కార్ల ధరలు, యువతలో ప్రీమియం వాహనాలపై పెరుగుతున్న ఆకాంక్షల నేపథ్యంలో ప్రీ-ఓన్డ్‌ లగ్జరీ కార్లకు డిమాండ్‌ పెరుగుతోంది. ప్రస్తుతం ఈ విభాగంలోని కొనుగోలుదారుల సగటు వయసు 35–40 ఏళ్లుగా ఉంది. గతేడాదితో పోలిస్తే ఈ ఏడాది తొలి అర్ధభాగంలో వాడిన లగ్జరీ కార్ల మార్కెట్‌ దాదాపు 21 శాతం వృద్ధి చెందగా, విక్రయమైన వాహనాల సగటు ధర 25 శాతం పెరిగింది. ముఖ్యంగా రూ.15–30 లక్షల ధరల శ్రేణిలో ప్రీమియం బ్రాండ్ల కార్లు, మెరుగైన ఫీచర్లతో కూడిన మోడళ్లకు ఆదరణ పెరుగుతోంది. సెడాన్ల కంటే ఎస్‌యూవీలకు ఎక్కువ గిరాకీ కనిపిస్తుండగా, పెట్రోల్‌ వాహనాలతో పోలిస్తే డీజిల్‌ మోడళ్లపైనా ఆసక్తి కొనసాగుతోంది.

ప్రీ-ఓన్డ్‌ లగ్జరీ కార్ల కొనుగోలులో వినియోగదారులు బ్రాండ్‌తో పాటు తయారీ సంవత్సరం, వాహనం పరిస్థితి, సర్వీసింగ్‌ చరిత్ర, ప్రమాదాల వివరాలు, మిగిలిన వారంటీ, నిర్వహణ వ్యయం, భవిష్యత్తులో రీసేల్‌ విలువ వంటి అంశాలను పరిశీలిస్తున్నారు. మరోవైపు వాడిన లగ్జరీ ఈవీలకు కూడా ఆసక్తి పెరుగుతున్నా.. బ్యాటరీ ఆరోగ్యం, రేంజ్‌, బ్యాటరీ మార్పిడి ఖర్చు, వారంటీ వంటి అంశాలు కొనుగోలుదారులకు కీలకంగా మారాయి. దసరా, దీపావళి నేపథ్యంలో అక్టోబరు–డిసెంబరు త్రైమాసికంలో ప్రీ-ఓన్డ్‌ లగ్జరీ కార్ల విక్రయాలు సుమారు 30 శాతం పెరగొచ్చని మార్కెట్‌ వర్గాలు అంచనా వేస్తున్నాయి. సులభమైన రుణ సదుపాయాలు, విక్రయానంతర సేవలు అందుబాటులో ఉండటంతో వ్యవస్థీకృత మార్కెట్‌పై యువతలో నమ్మకం పెరుగుతోంది.