

ఉద్యోగుల భవిష్యనిధి సంస్థ (EPFO) చందాదారులకు మరో కీలక వెసులుబాటు కల్పించే దిశగా అడుగులు వేస్తోంది. పదవీ విరమణ తర్వాత పీఎఫ్ నిధులను ఒకేసారి పూర్తిగా ఉపసంహరించుకోకుండా, నెలవారీగా లేదా ఇతర కాల వ్యవధుల్లో విడతలవారీగా తీసుకునేలా సిస్టమాటిక్ విత్డ్రా ప్లాన్ (SWP)ను ప్రవేశపెట్టాలని యోచిస్తోంది. ఈ ప్రతిపాదనను త్వరలో జరగనున్న సెంట్రల్ బోర్డ్ ఆఫ్ ట్రస్టీస్ (CBT) సమావేశంలో చర్చించనున్నట్లు సంబంధిత వర్గాలు వెల్లడించాయి. ప్రస్తుతం చాలామంది ఉద్యోగులు రిటైర్మెంట్ తర్వాత తమ పీఎఫ్ మొత్తాన్ని ఒకేసారి తీసుకుని ఇతర పెట్టుబడి మార్గాల్లో పెడుతున్నారని EPFO గుర్తించింది. ఈ నేపథ్యంలో మిగిలిన నిధికి వడ్డీ ప్రయోజనం కొనసాగుతూనే, అవసరానికి అనుగుణంగా డబ్బులు తీసుకునే వెసులుబాటు కల్పించాలనుకుంటోంది. ఈ పథకాన్ని అమలు చేయాలంటే ఎంప్లాయీస్ ప్రావిడెంట్ ఫండ్స్ స్కీమ్, 2026లో అవసరమైన సవరణలు చేయాల్సి ఉంటుంది.
ప్రతిపాదిత SWP పథకం ప్రకారం చందాదారులు తమ పీఎఫ్ నిధుల నుంచి నెలవారీగా, మూడు నెలలకు ఒకసారి, ఆరు నెలలకు ఒకసారి లేదా ఏడాదికోసారి నిర్ణీత మొత్తాన్ని ఉపసంహరించుకోవచ్చు. ప్రస్తుతం 55 ఏళ్లు దాటిన చందాదారులు నిబంధనల ప్రకారం పూర్తి పీఎఫ్ మొత్తాన్ని తీసుకునే అవకాశం ఉంది. 55 ఏళ్లలోపు పదవీ విరమణ చేసినవారు సాధారణంగా 75 శాతం నిధులను ఉపసంహరించుకోవచ్చు. మిగిలిన మొత్తానికి నిర్దిష్ట ఉపసంహరణ నిబంధనలు వర్తిస్తాయి. 58 ఏళ్ల నుంచి అర్హత నిబంధనలకు అనుగుణంగా పెన్షన్ ప్రయోజనాలు అందుతాయి. కొత్త పథకం అమల్లోకి వస్తే కొంత మొత్తాన్ని తీసుకున్న తర్వాత కూడా మిగిలిన పీఎఫ్ బ్యాలెన్స్పై వడ్డీ కొనసాగుతుంది. చందాదారులు ఎప్పుడైనా ఈ పథకం నుంచి వైదొలిగే అవకాశం ఉండనుంది. జీవిత భాగస్వామి లేదా నామినీకి కూడా ఈ సదుపాయాన్ని వినియోగించుకునే అవకాశం కల్పించాలని ప్రతిపాదిస్తున్నారు. CBT సమావేశం అనంతరం దీనిపై మరింత స్పష్టత వచ్చే అవకాశం ఉంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!