జనసేన ఎమ్మెల్యేల పనితీరుపై చంద్రబాబు అసంతృప్తి?

పశ్చిమ గోదావరి జిల్లాలో కూటమి పార్టీల మధ్య రెండేళ్లుగా కొనసాగుతున్న అంతర్గత విభేదాలు క్రమంగా బహిరంగ చర్చకు వస్తున్నాయి. నియోజకవర్గాల్లో ఆధిపత్యం, ప్రోటోకాల్‌ అంశాలు, రాబోయే స్థానిక సంస్థల ఎన్నికల వ్యూహాలు విభేదాలకు కారణాలుగా మారుతున్నట్లు ఆయా పార్టీల నేతలు, కార్యకర్తల వ్యాఖ్యలు సూచిస్తున్నాయి. జిల్లాలోని ఏడు అసెంబ్లీ స్థానాల్లో టీడీపీ నాలుగు, జనసేన మూడు స్థానాలను గెలుచుకోగా.. నరసాపురం లోక్‌సభ స్థానాన్ని బీజేపీ దక్కించుకుంది. అయితే జనసేన ఎమ్మెల్యేలు ప్రాతినిధ్యం వహిస్తున్న నియోజకవర్గాల్లో టీడీపీ నేతల జోక్యం పెరుగుతోందని జనసేన శ్రేణులు అసంతృప్తి వ్యక్తం చేస్తున్నాయి. సీఎంఆర్‌ఎఫ్‌ చెక్కుల పంపిణీ, ప్రజల నుంచి అర్జీల స్వీకరణ వంటి కార్యక్రమాల్లో ప్రోటోకాల్‌ వివాదాలు చోటుచేసుకుంటున్నాయని వారు ఆరోపిస్తున్నారు. మరోవైపు టీడీపీ ఎమ్మెల్యేలు ఉన్న నియోజకవర్గాల్లో జనసేన, బీజేపీ కార్యకర్తలకు తగిన ప్రాధాన్యం దక్కడం లేదనే అసంతృప్తి కూడా వ్యక్తమవుతోంది.

తాడేపల్లిగూడెంలో జనసేన ఎమ్మెల్యే బొలిశెట్టి శ్రీనివాస్, టీడీపీ నియోజకవర్గ ఇన్‌చార్జి వలవల బాబ్జి మధ్య విభేదాలు బహిరంగమయ్యాయి. తన పనితీరుపై విమర్శలు ఉంటే ఎమ్మెల్యే పదవికి రాజీనామా చేసేందుకు సిద్ధమని బొలిశెట్టి శ్రీనివాస్ సవాల్‌ చేసినట్లు సమాచారం. స్థానిక సంస్థల ఎన్నికల్లో జనసేన గెలిచే స్థానాలను త్యాగం చేసేది లేదని కూడా ఆయన స్పష్టం చేసినట్లు తెలుస్తోంది. నరసాపురంలో ఎమ్మెల్యే బొమ్మిడి నాయకర్‌పై సీఎం చంద్రబాబు చేసిన వ్యాఖ్యల నేపథ్యంలో జనసేన శ్రేణుల్లో అసంతృప్తి వ్యక్తమైంది. ప్రభుత్వ పథకాలు, నిధుల కేటాయింపుపై ప్రశ్నలు లేవనెత్తుతూ ఎమ్మెల్యే పేరుతో ఓ కరపత్రం ప్రచారంలోకి వచ్చినట్లు సమాచారం. దీంతో పశ్చిమ గోదావరి కూటమిలోని అంతర్గత విభేదాలు మరోసారి చర్చనీయాంశంగా మారాయి.