దేశవ్యాప్తంగా రేపు పలు రాష్ట్రాల్లో ఉప ఎన్నికలు

దేశంలో ఉప ఎన్నికల సందడి నెలకొంది. అక్టోబర్‌ 6న నాలుగు రాష్ట్రాలు, ఒక కేంద్ర పాలిత ప్రాంతంలో ఆరు స్థానాలకు పోలింగ్‌ జరగనుంది. వీటిలో ఐదు అసెంబ్లీ స్థానాలు, ఒక లోక్‌సభ స్థానం ఉన్నాయి. తమిళనాడులో మదురంతకం, ధారాపురం, పశ్చిమ బెంగాల్‌లో నందిగ్రామ్‌, రెజీనగర్‌, పుదుచ్చేరిలో తట్టంచావడి అసెంబ్లీ స్థానాలకు, అసోంలోని నాగావ్‌ లోక్‌సభ స్థానానికి ఓటింగ్‌ నిర్వహించనున్నారు. అక్టోబర్‌ 9న ఓట్ల లెక్కింపు చేపట్టి ఫలితాలను ప్రకటించనున్నారు. ఈ ఉప ఎన్నికలు ఆయా రాష్ట్రాల్లో అధికార, ప్రతిపక్ష పార్టీలకు కీలక రాజకీయ పరీక్షగా మారాయి.

తమిళనాడులో మదురంతకం, ధారాపురం స్థానాల్లో బహుముఖ పోటీ నెలకొంది. తమిళగ వెట్రి కళగం, ద్రవిడ మున్నేట్ర కళగం, అఖిల భారత అన్నా ద్రవిడ మున్నేట్ర కళగం మధ్య పోటీపై ఆసక్తి నెలకొనగా.. తమిళగ వెట్రి కళగం అధినేత విజయ్‌ ప్రచారం ఎన్నికలకు మరింత ప్రాధాన్యం తెచ్చింది. పశ్చిమ బెంగాల్‌లో నందిగ్రామ్‌, రెజీనగర్‌ ఫలితాలపైనా ఉత్కంఠ నెలకొంది. నందిగ్రామ్‌లో భారతీయ జనతా పార్టీ, కాంగ్రెస్‌ మధ్య పోటీతో పాటు రెజీనగర్‌లో తృణమూల్ కాంగ్రెస్‌, కాంగ్రెస్‌, ఇతర వర్గాల మధ్య పోటీ కొనసాగుతోంది. ఓటర్ల జాబితా సవరణపై ఎస్‌ఐఆర్‌ అంశం కూడా ప్రచారంలో ప్రధాన చర్చగా మారింది. పుదుచ్చేరిలో తట్టంచావడి, అసోంలోని నాగావ్‌ లోక్‌సభ ఫలితాలు కూడా ఆయా ప్రాంతాల్లో పార్టీల బలాబలాలను ప్రభావితం చేసే అవకాశం ఉంది.