ఏపీ లో త్వరలో నంది అవార్డ్స్ స్టార్ట్ చేస్తము - మంత్రి కందుల దుర్గేష్

ఆంధ్రప్రదేశ్‌లో కొంతకాలంగా నిలిచిపోయిన ప్రతిష్ఠాత్మక నంది అవార్డులను త్వరలోనే మళ్లీ ప్రారంభించనున్నట్లు రాష్ట్ర సినిమాటోగ్రఫీ, పర్యాటకం, సాంస్కృతిక శాఖల మంత్రి కందుల దుర్గేష్ తెలిపారు. విశాఖపట్నంలో మీడియాతో మాట్లాడిన ఆయన, ఈ కార్యక్రమం పునఃప్రారంభానికి ప్రభుత్వం ఇప్పటికే చర్యలు చేపట్టిందని వెల్లడించారు. సినిమా, టెలివిజన్, నాటక రంగాలకు చెందిన కళాకారులకు గౌరవం, గుర్తింపు ఇవ్వడంలో ప్రభుత్వం పూర్తి మద్దతు ఇస్తుందని హామీ ఇచ్చారు.

నంది అవార్డుల పునరుద్ధరణతో తెలుగు కళారంగానికి కొత్త ఉత్సాహం లభిస్తుందని మంత్రి పేర్కొన్నారు. అదే సమయంలో, విశాఖపట్నం నగరం సినిమా చిత్రీకరణకు అనుకూలమైన అద్భుతమైన ప్రదేశాలతో ఉందని, వాటిని ప్రోత్సహించి మరిన్ని నిర్మాణ సంస్థలను ఆకర్షించే దిశగా చర్యలు తీసుకుంటామని తెలిపారు.

రాష్ట్రంలో సినిమా రంగాన్ని బలోపేతం చేయడంతో పాటు కళాకారుల అభివృద్ధికి ప్రభుత్వం కట్టుబడి ఉందని మంత్రి స్పష్టం చేశారు.