‘సతీ లీలావతి’ పూర్తి వినోదాత్మక చిత్రం – లావణ్య త్రిపాఠి

లావణ్య త్రిపాఠి కొణిదెల ప్రధాన పాత్రలో తెరకెక్కిన ‘సతీ లీలావతి’ చిత్రం ప్రేక్షకులను వినోదంతో ఆకట్టుకుంటుందని ఆమె విశ్వాసం వ్యక్తం చేశారు. ఆనంది ఆర్ట్స్ సమర్పణలో దుర్గాదేవి పిక్చర్స్ బ్యానర్‌పై నాగమోహన్ నిర్మించిన ఈ చిత్రానికి తాతినేని సత్య దర్శకత్వం వహించారు. దేవ్ మోహన్ హీరోగా నటిస్తున్న ఈ సినిమా ఈ నెల 8న ప్రపంచవ్యాప్తంగా విడుదల కానుంది. ఈ చిత్రం ఇప్పటికే చూసినట్లు తెలిపిన లావణ్య, ప్రేక్షకులకు ఇది బాగా నచ్చుతుందని అన్నారు.

చిత్రీకరణ సమయంలోనే తాను గర్భవతినని తెలిసినా టీమ్ సపోర్ట్‌తో షూటింగ్ పూర్తి చేశానని ఆమె వెల్లడించారు. ఈ సినిమాలో తాను డైరెక్టర్ పాత్రలో కనిపిస్తానని, ఇందులో కామెడీతో పాటు భావోద్వేగాలు కూడా ఉంటాయని తెలిపారు. రామ్ చరణ్, చిరంజీవి తమకు ఎప్పుడూ మద్దతుగా ఉంటారని పేర్కొన్నారు. ప్రస్తుతం కుటుంబంతో గడపడానికి సినిమాలకు విరామం తీసుకుంటున్నానని లావణ్య చెప్పారు.