ఆర్టీసీ చార్జీల పెంపు పై స్పష్టత ఇచ్చిన ఎండీ నాగిరెడ్డి

టీజీఎస్‌ ఆర్టీసీ టికెట్ ధరలు పెరిగాయని సోషల్ మీడియాలో వస్తున్న పోస్టులు అధికారికంగా తప్పుబట్టబడ్డాయి. మెట్రో ఎక్స్‌ప్రెస్‌ బస్సుల్లో 30 రూపాయల బదులు 45 రూపాయలు వసూలు చేస్తున్నారని, ఒక్కసారిగా 15 రూపాయలు పెంచడం దారుణమని ఒక నెటిజన్ చేసిన పోస్ట్ వైరల్ కావడంతో వివాదం మొదలైంది. ఈ విషయం పై ప్రతిపక్ష నేత కేటీఆర్ కూడా స్పందించడం ఎక్కువ చర్చకు దారితీసింది.

ఈ నేపథ్యంలో ఆర్టీసీ ఎండీ వై. నాగిరెడ్డి ఇచ్చిన వివరాలను ఆధారంగా తీసుకుని తెలంగాణ ఫ్యాక్ట్ చెక్ స్పష్టతనిచ్చింది. సంస్థ ప్రకారం, అక్టోబర్ 6, 2025న గ్రేటర్ హైదరాబాద్ పరిధిలో నడిచే బస్సుల పై ఇన్‌ఫ్రాస్ట్రక్చర్‌ సెస్ మాత్రమే అమలు చేసినట్లు, దాని తర్వాత రాష్ట్రంలో ఎలాంటి టికెట్ ధరల పెంపు జరగలేదని తెలిపింది. సాధారణంగా బస్సుల ఛార్జీలు డీజిల్ ధరల మార్పుల పై ఆధారపడి ఉంటాయని, ధరలు పెరిగితే ప్రతిపాదనలు ప్రభుత్వం వద్ద ఉంచుతామని, అయితే ప్రయాణికులకు భారమవుతుందని భావించినప్పుడు ప్రభుత్వం ఆ ప్రతిపాదనలను తిరస్కరిస్తుందని ఆర్టీసీ స్పష్టం చేసింది.

ఇంకా, ఇన్‌ఫ్రాస్ట్రక్చర్‌ సెస్ వసూలు చేస్తున్న విషయం చాలాకాలం తర్వాత కూడా కొంతమంది ప్రయాణికులకు తెలియకపోవడం వల్లే ఈ అపోహలు రేపబడుతున్నాయని ఆర్టీసీ పేర్కొంది.