రష్యా ఆయిల్ ట్యాంకర్‌ను అడ్డుకున్న ఫ్రాన్స్ నౌకాదళం

అంతర్జాతీయ ఆంక్షల పరిధిలో ఉన్న రష్యా నుంచి చమురు తరలిస్తున్న ఓ ఆయిల్ ట్యాంకర్‌ను ఫ్రాన్స్ నౌకాదళం, బ్రిటన్ సహకారంతో అట్లాంటిక్ మహాసముద్రంలో అడ్డుకుంది. ‘టాగోర్’ అనే నౌకను ఆపినట్లు ఫ్రాన్స్ అధ్యక్షుడు ఇమాన్యుయెల్ మెక్రాన్ ఎక్స్‌లో వీడియోతో సహా వెల్లడించారు.

అంతర్జాతీయ ఆంక్షలను ఉల్లంఘించడం, సముద్ర చట్టాలను పాటించకపోవడం, రష్యా ఉక్రెయిన్‌పై కొనసాగిస్తున్న యుద్ధానికి చమురు ఎగుమతుల ద్వారా నిధులు సమకూర్చడం ఆమోదయోగ్యం కాదని మెక్రాన్ పేర్కొన్నారు. ఈ చర్య అంతర్జాతీయ సముద్ర భద్రత అమలులో కీలకంగా మారింది.