సుప్రీంకోర్టు కొలీజియం సిఫార్సులకు గ్రీన్ సిగ్నల్

సుప్రీంకోర్టు కొలీజియం సిఫార్సు చేసిన ఐదుగురు నూతన న్యాయమూర్తుల నియామకానికి రాష్ట్రపతి ద్రౌపదీ ముర్ము ఆమోదం తెలిపారు. కేంద్ర న్యాయ మంత్రిత్వ శాఖ వీరి నియామకాలపై విడివిడిగా ఉత్తర్వులు జారీ చేసింది. దీంతో సుప్రీంకోర్టు న్యాయమూర్తుల సంఖ్య 37కి పెరగనుంది.

ఈ నియామకాల్లో పలు హైకోర్టుల ప్రధాన న్యాయమూర్తులతో పాటు సీనియర్ న్యాయవాది వి. మోహన కూడా ఉన్నారు. ఆమె సుప్రీంకోర్టుకు నేరుగా నియమితులైన రెండో మహిళా న్యాయవాది కానున్నారు. ప్రధాన న్యాయమూర్తి సూర్యకాంత్ వీరితో ప్రమాణం చేయించనున్నారు. ఈ నియామకాలతో జార్ఖండ్, తమిళనాడుకు ప్రాతినిధ్యం లభించనుండగా, వయోపరిమితుల కారణంగా కొత్త న్యాయమూర్తుల్లో ఎవ్వరూ సీజేఐగా పదోన్నతి పొందే అవకాశం లేదు.