ఇండియా చేరుకున్న పీవీ సింధు

గల్ఫ్ ప్రాంతాల్లో ఉద్రిక్తతల కారణంగా దుబాయ్‌లో చిక్కుకుపోయిన భారత స్టార్ షట్లర్ పీవీ సింధు (PV Sindhu) సురక్షితంగా భారత్ చేరుకున్నారు. ఈ రోజు ఆమె దుబాయ్ నుండి బయలుదేరి బెంగళూరు ఎయిర్‌పోర్ట్‌లో దిగారు. ఈ విషయం గురించి సింధు తన సోషల్ మీడియా ఖాతా ‘ఎక్స్’‌లో వెల్లడించారు. ఆమె తాను సురక్షితంగా ఇంటికి చేరుకున్న విషయాన్ని షేర్ చేయడంతో పాటు, దుబాయ్‌లో గడిచిన కొన్ని రోజుల అనిశ్చిత పరిస్థితుల గురించి వివరించారు.

సింధు తన సురక్షిత ప్రయాణంలో సహాయం చేసిన దుబాయ్ అధికారులు, ఎయిర్‌పోర్ట్ సిబ్బంది, ఇమిగ్రేషన్ అధికారులకు ప్రత్యేక కృతజ్ఞతలు తెలిపారు. ఆమె ప్రస్తుతం విశ్రాంతి తీసుకుంటూ, రీసెట్ అయిన తర్వాత తన భవిష్యత్తు ప్రణాళికలను పునరాలోచన చేయనున్నట్లు తెలిపారు.

పీవీ సింధు ఆల్ ఇంగ్లాండ్ బ్యాడ్మింటన్ ఛాంపియన్‌షిప్ కోసం ఇంగ్లాండ్ బయలుదేరినప్పటికీ, దుబాయ్ మీదుగా వెళ్తూ అమెరికా-ఇజ్రాయెల్, ఇరాన్ మధ్య ఉద్రిక్తతల కారణంగా అక్కడి విమానాశ్రయంలో చిక్కుకున్నారు. గత శనివారం నుంచి విమాన సర్వీసులు రద్దు కావడంతో ఆమె ప్రయాణం ఆగిపోయింది. యూఏఈ మరియు భారత అధికారుల సమన్వయంతో సింధు సహా అక్కడ చిక్కుకున్న భారతీయులను స్వదేశానికి తీసుకురాగలిగారు.