ఏపీలో త్వరలో నంది అవార్డులు - మంత్రి కందుల దుర్గేష్

సినిమా, టీవీ మరియు నాటక రంగాలకు ప్రతిష్టాత్మకంగా ఇచ్చే నంది అవార్డులపై ఏపీ మంత్రి కందుల దుర్గేష్ కీలక ప్రకటన చేశారు. నంది అవార్డుల నిర్వహణకు ముఖ్యమంత్రి చంద్రబాబు నాయుడు ఆమోదం తెలిపారని, త్వరలోనే ఈ అవార్డులను ప్రదానం చేస్తామని మంత్రి వెల్లడించారు. రాజమండ్రిలో మీడియాతో మాట్లాడుతూ ఈ విషయాన్ని ఆయన స్పష్టం చేశారు.

2014, 2015, 2016 సంవత్సరాలకు సంబంధించిన నంది అవార్డులను 2017లో అప్పటి టీడీపీ ప్రభుత్వం ఇచ్చిందని, ఆ తర్వాత ఈ అవార్డులు నిలిచిపోయాయని దుర్గేష్ తెలిపారు. ఇప్పుడు మళ్లీ అవార్డులు ఇవ్వాలని ప్రభుత్వం నిర్ణయించిందని చెప్పారు. గతంలో ఉన్న నిబంధనల ప్రకారమే అవార్డులు ఇవ్వాలా, లేక కొన్ని మార్పులు చేయాలా అనే అంశంపై తుది నిర్ణయం తీసుకోవాల్సి ఉందని వివరించారు.

ఈ విషయంలో డిప్యూటీ సీఎం పవన్ కళ్యాణ్, నటుడు నందమూరి బాలకృష్ణ నుంచి సలహాలు తీసుకుంటామని మంత్రి తెలిపారు. రెండు నుంచి మూడు నెలల్లో నంది అవార్డుల వేడుక నిర్వహించనున్నట్లు చెప్పారు. అలాగే నంది నాటకోత్సవాలను కూడా ఏర్పాటు చేయనున్నామని వెల్లడించారు.