మొక్కజొన్న ధరలు పతనం.. రైతుల కోసం కేంద్రానికి చంద్రబాబు విజ్ఞప్తి!

మొక్కజొన్న రైతుల సమస్యలపై ముఖ్యమంత్రి చంద్రబాబు నాయుడు కేంద్ర వ్యవసాయ మంత్రి శివరాజ్ సింగ్ చౌహన్‌కు లేఖ రాశారు. 2025-26 రబీ సీజన్‌లో పండించిన మొక్కజొన్న పంటను కొనుగోలు చేయాలని, ధరల వ్యత్యాస చెల్లింపు పథకం ద్వారా రైతులకు సహాయం చేయాలని కేంద్రాన్ని కోరారు. మార్కెట్‌లో ధరలు తగ్గిపోవడంతో రైతులు ఆందోళనలో ఉన్నారని ఆయన తెలిపారు.

ప్రస్తుతం మార్కెట్‌లో మొక్కజొన్న ధర క్వింటాల్‌కు 1600 నుంచి 1700 రూపాయల మధ్య ఉండగా, కనీస మద్దతు ధర 2400 రూపాయల కంటే చాలా తక్కువగా ఉంది. రాష్ట్రంలో సుమారు 42.06 లక్షల మెట్రిక్ టన్నుల దిగుబడి వచ్చే అవకాశం ఉండగా, మరో 14.26 లక్షల మెట్రిక్ టన్నుల పంట కోత దశలో ఉంది. ఈ పరిస్థితిలో ప్రభుత్వం జోక్యం చేసుకోకపోతే రైతులు తీవ్ర నష్టాలు ఎదుర్కోవాల్సి వస్తుందని ముఖ్యమంత్రి హెచ్చరించారు.

ధరల వ్యత్యాసాన్ని రైతులకు నేరుగా చెల్లించే పథకాన్ని అమలు చేయాలని, ఆంధ్రప్రదేశ్‌కు ప్రత్యేకంగా 100 శాతం నిధులను కేంద్రం భరించాలని కోరారు. ఈ పథకాన్ని ఈ ఏడాది జూన్ వరకు పొడిగించాలని కూడా విజ్ఞప్తి చేశారు. సంబంధిత సంస్థలు సమన్వయంతో పని చేసేలా తక్షణమే అనుమతులు ఇవ్వాలని ముఖ్యమంత్రి అభ్యర్థించారు.