రూ.198 కోట్లతో కాళేశ్వరం ఆలయ పునర్నిర్మాణం ప్రారంభం

కాళేశ్వరం క్షేత్ర అభివృద్ధికి తెలంగాణ ప్రభుత్వం కీలక చర్యలు ప్రారంభించింది. రూ.198 కోట్ల వ్యయంతో ఆలయ పునర్నిర్మాణం, అభివృద్ధి పనులకు ముఖ్యమంత్రి రేవంత్‌రెడ్డి భూమిపూజ నిర్వహించారు. అదే సందర్భంగా రూ.3.71 కోట్లతో ఆర్టీసీ మోడల్‌ బస్టాండ్ నిర్మాణానికి కూడా శంకుస్థాపన చేశారు. ఈ కార్యక్రమంలో పలువురు మంత్రులు, ప్రజాప్రతినిధులు, అధికారులు పాల్గొన్నారు.

ముఖ్యమంత్రి సాయంత్రం కాళేశ్వరం చేరుకోగా అర్చకులు పూర్ణకుంభంతో స్వాగతం పలికారు. అనంతరం కాళేశ్వర-ముక్తీశ్వరాలయాన్ని దర్శించి ప్రత్యేక పూజలు నిర్వహించారు. తర్వాత మంత్రులతో కలిసి మేడిగడ్డ బ్యారేజీని సందర్శించి ఇంజినీరింగ్ అధికారులతో పనులపై సమీక్ష నిర్వహించారు.

ఈ కార్యక్రమాల అనంతరం కాటారం మండలం నస్తూర్‌పల్లిలో జరిగిన రైతు ఉత్సవాల సభలో ముఖ్యమంత్రి పాల్గొని ప్రసంగించారు. ఆలయ అభివృద్ధితో పాటు ప్రాంతీయ మౌలిక సదుపాయాల అభివృద్ధికి ప్రభుత్వం కట్టుబడి ఉందని ఆయన పేర్కొన్నారు.