జైలర్ 2 ఫుటేజ్ లీక్.. చర్యలకు హెచ్చరికలు

దళపతి విజయ్ నటించిన ‘జన నాయగన్’ మూవీ విడుదలకు ముందే లీక్ కావడంతో ఇది దేశవ్యాప్తంగా సంచలనంగా మారింది. ఇదే సమయంలో రజనీకాంత్ నటిస్తున్న ‘జైలర్ 2’ సినిమాకు సంబంధించిన కొన్ని సీన్లు కూడా సోషల్ మీడియాలో వైరల్ అవుతున్నాయి. ఈ ఘటనలతో చిత్ర యూనిట్ తీవ్ర దిగ్భ్రాంతికి గురైంది. వైరల్ అవుతున్న క్లిప్స్‌ను ప్రచారం చేయవద్దని చిత్ర బృందం ప్రేక్షకులను కోరింది.

‘జైలర్’ సినిమాకు సీక్వెల్‌గా పార్ట్ 2ను దర్శకుడు నెల్సన్ దిలీప్‌కుమార్ తెరకెక్కిస్తున్న విషయం తెలిసిందే. భారీ బడ్జెట్‌తో కళానిధి మారన్ ఈ చిత్రాన్ని నిర్మిస్తున్నారు. త్వరలో విడుదలకు సిద్ధమవుతున్న ఈ సినిమా నుంచి కీలక ఫుటేజ్ లీక్ కావడంతో నిర్మాణ సంస్థ అధికారికంగా ప్రకటన విడుదల చేసింది. సెట్స్ నుంచి లీక్ అయిన వీడియోలను ఎవరూ షేర్ చేయవద్దని, తమ పైరసీ నిరోధక బృందం ఈ విషయాన్ని పర్యవేక్షిస్తోందని తెలిపింది. అలాగే ఎవరైనా వీడియోలను షేర్ చేస్తే చట్టపరమైన చర్యలు తీసుకుంటామని హెచ్చరించింది.