హాలీవుడ్ సినీ లోకంలో విషాద ఛాయలు, రాబ్ రైనర్, మిచెల్ దంపతుల మృతి కలకలం

ప్రముఖ హాలీవుడ్ దర్శకుడు, నటుడు రాబ్ రైనర్ (78) మరియు ఆయన సతీమణి మిచెల్ అనుమానాస్పద పరిస్థితుల్లో మృతి చెందారు. లాస్ ఏంజెల్స్‌లోని వారి నివాసంలో ఆదివారం ఇద్దరూ విగతజీవులుగా కనిపించినట్లు సమాచారం. వారి శరీరాలపై కత్తిపోట్లు ఉన్నట్లు పోలీసులు అనుమానిస్తున్నారని హాలీవుడ్ వర్గాలు వెల్లడించాయి. ఈ ఘటనపై ఇంకా అధికారిక ప్రకటన వెలువడనప్పటికీ, లాస్ ఏంజెల్స్ పోలీస్ డిపార్ట్‌మెంట్‌కు చెందిన కెప్టెన్ మైక్ బ్లాండ్ ప్రస్తుతం ఈ హత్యలపై దర్యాప్తు కొనసాగుతోందని తెలిపారు.

80, 90వ దశకాల్లో రాబ్ రైనర్ ఎన్నో గుర్తుండిపోయే చిత్రాలను తెరకెక్కించారు. ఐదు దశాబ్దాల సినీ ప్రయాణంలో ‘దిస్ ఈజ్ స్పైనల్ ట్యాప్’, ‘స్టాండ్ బై మీ’, ‘ఏ ఫ్యూ గుడ్ మెన్’ వంటి చిత్రాలతో దర్శకుడిగా తన ప్రతిభను చాటుకున్నారు. అలాగే ‘బై బై లవ్’, ‘హాల్స్ ఆఫ్ యాంగర్’ వంటి సినిమాల్లో నటుడిగా కూడా తనదైన ముద్ర వేశారు. ఆయన అకాల మరణంపై పలువురు హాలీవుడ్ సినీ ప్రముఖులు సంతాపం వ్యక్తం చేశారు.