రేవంత్ రెడ్డి పిటిషన్‌లపై ప్రభుత్వానికి హైకోర్టు నోటీసులు

తెలంగాణ హైకోర్టు మంగళవారం ముఖ్యమంత్రి ఎ. రేవంత్ రెడ్డి దాఖలు చేసిన పిటిషన్‌లపై రాష్ట్ర ప్రభుత్వానికి నోటీసులు జారీ చేసింది. 2019 హుజూర్‌నగర్ ఉప ఎన్నికల సమయంలో నమోదైన నాలుగు కేసులను కొట్టివేయాలని ఆయన కోర్టును ఆశ్రయించారు. ఈ కేసులో పోలీసులతో పాటు ఫిర్యాదుదారులైన డిప్యూటీ ఈఈ పి. ప్రవీణ్‌ కుమార్, సర్వే ఇన్‌స్పెక్టర్ ఎం. నరేందర్, ఎంసీసీ -1 డాక్టర్ పి. పెంటయ్య, డిప్యూటీ ఈఈ ఎం. పవన్‌ కుమార్‌లకు కూడా నోటీసులు జారీ చేశారు. జస్టిస్ కె. సుజన విచారణను ఈ నెల 21వ తేదీకి వాయిదా వేస్తూ పూర్తి వివరాలతో కౌంటర్లు దాఖలు చేయాలని ఆదేశించారు.

హుజూర్‌నగర్ ఉప ఎన్నికల్లో కాంగ్రెస్ అభ్యర్థి పద్మావతికి మద్దతుగా నిర్వహించిన రోడ్‌షోల సందర్భంగా ఎన్నికల ప్రవర్తనా నియమావళి ఉల్లంఘన జరిగిందని ఈ కేసులు నమోదు అయ్యాయి. ఈ కేసుల్లో ఉత్తమ్ కుమార్ రెడ్డి సహా పలువురు కాంగ్రెస్ నేతలపై ఆరోపణలు ఉన్నాయి. ట్రాఫిక్‌కు అంతరాయం కలిగించడం, జనపహాడ్ గ్రామంలో 500 మందితో ర్యాలీ నిర్వహించడం, హుజూర్‌నగర్ పట్టణంలో 10 వేల మందితో సభ నిర్వహించడం, నేరేడుచర్ల వద్ద డీజేలు వినియోగించడం వంటి ఆరోపణలు నమోదయ్యాయి. పిటిషనర్ తరఫు న్యాయవాది ఈ కేసుల్లో సరైన ఆధారాలు లేవని వాదిస్తూ, ఇదే కేసుల్లో ఉత్తమ్ కుమార్ రెడ్డిపై నమోదైన కేసులను హైకోర్టు ఇప్పటికే కొట్టివేసిందని కోర్టు దృష్టికి తీసుకువచ్చారు.