హిట్ మిషన్ అనిల్ రావిపూడి లాంచ్ చేసిన ‘లవ్ ఇన్సూరెన్స్ కంపెనీ’ హైలీ ఎంటర్‌టైనింగ్‌ ట్రైలర్

యంగ్ సెన్సేషన్ ప్రదీప్ రంగనాథన్ హీరోగా, విఘ్నేష్ శివన్ దర్శకత్వంలో రూపొందిన క్రేజీ లవ్ స్టోరీ ‘లవ్ ఇన్సూరెన్స్ కంపెనీ’కి సంబంధించి తాజాగా విడుదలైన తెలుగు ట్రైలర్‌కు మంచి స్పందన లభిస్తోంది. ఈ చిత్రాన్ని నయనతార నిర్మించగా, కృతి శెట్టి హీరోయిన్‌గా నటించారు. ఎస్.జె. సూర్య, యోగి బాబు కీలక పాత్రల్లో కనిపించనున్నారు. ఇప్పటికే విడుదలైన తెలుగు టీజర్‌కు ప్రేక్షకుల నుంచి అద్భుతమైన రెస్పాన్స్ వచ్చిన సంగతి తెలిసిందే. తాజాగా హిట్ మిషన్ అనిల్ రావిపూడి ఈ చిత్ర తెలుగు ట్రైలర్‌ను లాంచ్ చేశారు.

ట్రైలర్‌లో ఎస్.జె. సూర్య వాయిస్‌తో ప్రారంభమై, ''మన లైఫ్ లో ఏవైతే ముఖ్యమో అవన్నీ ఇన్సూరెన్స్ చేస్తున్న ఈ లోకంలో ఇన్సూరెన్స్ చేయడానికి ఏదైనా దారి లేదా.. ఆ దారి.. లవ్ ఇన్సూరెన్స్ కంపెనీ' అంటూ ఎస్జే సూర్య వాయిస్ తో మొదలైన ట్రైలర్ ఆద్యంతం అదిరిపోయింది. 'ఇంతకుముందు ఇంట్లో వాళ్ళు ఒప్పుకోలేదు కులం ఒప్పుకోలేదు, జాతకం కోసం ఒప్పుకోలేదు, చుట్టాలు ఒప్పుకోలేదు అమ్మ ఒప్పుకోలేదు నాన్న ఒప్పుకోలేదు అని బ్రేకప్ చెప్పే వాళ్ళు.. ఇప్పుడు ఒక యాప్ ఒప్పుకోలేదని బ్రేకప్ చెప్తున్నారా'' అంటూ ప్రదీప్ రంగనాథ చెప్పిన డైలాగ్ ఈ సినిమా ఎంటర్టైనింగ్ కాన్ఫ్లిక్ట్ అద్భుతంగా ప్రజెంట్ చేసింది.

ప్రదీప్ రంగనాథన్ తన ఎనర్జిటిక్ పెర్ఫార్మెన్స్‌తో ఆకట్టుకోగా, ఆయనకు కృతి శెట్టితో ఉన్న కెమిస్ట్రీ కూడా కొత్తగా అనిపిస్తోంది. ఎస్.జె. సూర్య నటన ట్రైలర్‌లో హైలైట్‌గా నిలిచింది. దర్శకుడు విఘ్నేష్ శివన్ ఎంచుకున్న కాన్సెప్ట్, ఫ్యూచరిస్టిక్ వరల్డ్ యూనిక్‌గా ఉన్నాయి. అనిరుధ్ రవిచందర్ అందించిన బ్యాక్‌గ్రౌండ్ స్కోర్, రవి వర్మన్ కెమెరా వర్క్ కూడా నెక్స్ట్ లెవల్‌లో ఉన్నాయి. ట్రైలర్ సినిమాపై అంచనాలను మరింత పెంచగా, శ్రీ పద్మిని సినిమాస్ ద్వారా ఈ చిత్రం ఈ నెల 10న ఆంధ్రప్రదేశ్, తెలంగాణలో గ్రాండ్‌గా విడుదల కానుంది.