మావోయిస్టు ముప్పు తగ్గడంతో గ్రేహౌండ్స్‌, ఎస్‌ఐబీ విభాగాల్లో పెద్ద మార్పులు!

దాదాపు నాలుగున్నర దశాబ్దాల పాటు రాష్ట్రాన్ని వణికించిన వామపక్ష తీవ్రవాదం చివరి దశకు చేరుకోవడంతో పోలీసు శాఖలో వ్యవస్థాపరమైన మార్పులకు ప్రభుత్వం సిద్ధమవుతోంది. మావోయిస్టులపై పోరాటంలో కీలక పాత్ర పోషించిన గ్రేహౌండ్స్ కమాండో దళం, స్పెషల్ ఇంటెలిజెన్స్ బ్రాంచి (ఎస్‌ఐబీ)ల ప్రాధాన్యం తగ్గించే దిశగా చర్యలు ప్రారంభమైనట్లు సమాచారం. రాష్ట్రంలో మావోయిస్టు కార్యకలాపాలు దాదాపు అంతరించిపోయిన నేపథ్యంలో ప్రత్యేక దళాల అవసరంపై ప్రభుత్వం సమీక్ష జరుపుతున్నట్లు తెలుస్తోంది. ఇదే సమయంలో వామపక్ష తీవ్రవాద వ్యతిరేక ప్రత్యేక విభాగాలను క్రమంగా తగ్గించాలని కేంద్ర ప్రభుత్వం రాష్ట్రాలకు సూచించినట్లు సమాచారం.

గెరిల్లా తరహా దాడులను ఎదుర్కొనేందుకు ఐపీఎస్ అధికారి కె.ఎస్. వ్యాస్ రూపకల్పన చేసిన గ్రేహౌండ్స్ దళం ప్రపంచవ్యాప్తంగా గుర్తింపు పొందింది. అడవుల్లో దీర్ఘకాలం పనిచేయగలిగేలా, వేగవంతమైన దాడులు నిర్వహించేలా కమాండోలకు ప్రత్యేక శిక్షణ ఇస్తారు. ఎస్‌ఐబీ అందించే నిఘా సమాచారంపై ఆధారపడి అనేక విజయవంతమైన ఆపరేషన్లు నిర్వహించారు. ప్రస్తుతం రాష్ట్రంలో మావోయిస్టుల సంఖ్య చాలా తగ్గిపోయిన నేపథ్యంలో ఈ విభాగాల అవసరాన్ని పునఃపరిశీలిస్తున్నారు. కేంద్ర నిధులు తగ్గే అవకాశంతో పాటు పరిపాలనా పునర్వ్యవస్థీకరణలో భాగంగా గ్రేహౌండ్స్‌, ఎస్‌ఐబీ విభాగాలు క్రమంగా కనుమరుగయ్యే అవకాశం ఉందని అధికార వర్గాలు భావిస్తున్నాయి.