రెండో పెళ్ళికి ఎంగేజ్మెంట్ చేసుకున్న టీమ్ ఇండియా క్రికెటర్ శిఖర్ దావన్!

టీమిండియా మాజీ ఓపెనర్ శిఖర్ ధావన్ తన స్నేహితురాలు సోఫీ షైన్ తో నిశ్చితార్థం చేసుకున్నట్లు అధికారికంగా ప్రకటించారు. ఈనెల 12 న జరిగిన ఈ నిశ్చితార్థం విషయాన్ని ధావన్ స్వయంగా ఇన్‌స్టాగ్రామ్ ద్వారా వెల్లడిస్తూ, శుభాకాంక్షలు తెలిపిన వారందరికీ కృతజ్ఞతలు తెలిపారు. ఫిబ్రవరిలో వీరి వివాహం జరగనుందని, ఢిల్లీ-ఎన్‌సిఆర్ ప్రాంతంలో పెళ్లి వేడుకలు నిర్వహించే అవకాశముందని సమాచారం.

రిపోర్టుల ప్రకారం వచ్చే నెల 14 లేదా 15 తేదీల్లో వివాహం జరగవచ్చని తెలుస్తోంది. 2025 ఐసిసి ఛాంపియన్స్ ట్రోఫీ సమయంలో తొలిసారిగా కలిసి కనిపించిన ఈ జంట, తమ సంబంధాన్ని కొంతకాలం గోప్యంగా ఉంచింది. ఐర్లాండ్‌కు చెందిన సోఫీ షైన్ మార్కెటింగ్, మేనేజ్‌మెంట్‌లో డిగ్రీ పూర్తి చేయడంతో పాటు ప్రస్తుతం శిఖర్ ధావన్ ఫౌండేషన్‌లో చీఫ్ ఆపరేటింగ్ ఆఫీసర్‌గా పని చేస్తూ, వివిధ సామాజిక కార్యక్రమాల్లో ధావన్‌తో కలిసి చురుకుగా పాల్గొంటున్నారు.