కొడుకు మృతితో డైరెక్టర్ భారతి రాజాకు అనారోగ్యం

సీనియర్ దర్శకుడు భారతీరాజా హాస్పిటల్ బెడ్‌పై ఉన్న ఫొటో ఒకటి సోషల్ మీడియాలో వైరల్ కావడంతో అభిమానుల్లో ఆందోళన వ్యక్తమవుతోంది. ఈ ఫొటో చూసిన అభిమానులు ఆయన ఆరోగ్యం గురించి తీవ్రంగా ఆందోళన చెందుతూ, త్వరగా కోలుకోవాలని ఆకాంక్షిస్తున్నారు. ఎనభై ఏళ్ల వయసులో కూడా ఉత్సాహంగా కనిపించే భారతీరాజా ఇలా బలహీనంగా కనిపించడం అభిమానులను కలచివేస్తోంది.

తమిళనాడు బీజేపీ అధ్యక్షుడు నైనార్ నాగేంద్రన్ ఇటీవల చెన్నైలోని ఒక ప్రైవేట్ ఆసుపత్రిలో చికిత్స పొందుతున్న భారతీరాజాను పరామర్శించారు. ఆయన ఆరోగ్య పరిస్థితిపై వైద్యులను అడిగి తెలుసుకున్నారు. ఈ సందర్శన సందర్భంగా వైద్య సిబ్బందిలోని ఒకరు తీసిన ఫొటో ప్రస్తుతం సోషల్ మీడియాలో విస్తృతంగా ప్రచారం అవుతోంది. ఈ ఫొటో చూసి అభిమానులు దిగ్బ్రాంతికి గురై, ఆయన త్వరగా కోలుకోవాలని కోరుతున్నారు.

ఇదిలా ఉండగా, భారతీరాజా వ్యక్తిగత జీవితంలో ఇటీవల పెద్ద విషాదం చోటుచేసుకుంది. ఆయన కుమారుడు మనోజ్ భారతీరాజా 2025 మార్చిలో అనారోగ్యంతో మరణించారు. ఈ సంఘటన ఆయనను తీవ్రంగా కలచివేసినట్లు తెలుస్తోంది. అప్పటి నుంచి ఆరోగ్య సమస్యలు కూడా వెంటాడుతున్నాయి. తమిళ సినీ పరిశ్రమలో భారతీరాజా అనేక క్లాసిక్ చిత్రాలను తెరకెక్కించారు. 16 వయతినిలే చిత్రం ఆయనకు విశేష గుర్తింపును తీసుకువచ్చింది. ఇందులో కమల్ హాసన్, రజనీకాంత్, శ్రీదేవి నటించారు. ఈ సినిమాను తెలుగులో కె. రాఘవేంద్ర రావు ‘పదహారేళ్ల వయసు’ పేరుతో తెరకెక్కించగా, అది కూడా మంచి విజయాన్ని సాధించింది. అలాగే ‘ఆరాధన’, ‘సీతాకోకచిలుక’, ‘కొత్త జీవితాలు’, ‘జమదగ్ని’ వంటి చిత్రాలను కూడా ఆయన తెలుగులో రూపొందించారు.