నా అన్వేష్ పై జాతీయ మహిళా కమిషన్ కు ఫిర్యాదు..

తెలంగాణ రాష్ట్ర మహిళా కమిషన్‌కు “నా అన్వేషణ” అనే యూట్యూబ్ ఛానల్‌కు సంబంధించిన అనేక ఫిర్యాదులు అందాయి. సంబంధిత ఇన్‌ఫ్లుయెన్సర్ మహిళలపై అవమానకరమైన, అసభ్యకరమైన వ్యాఖ్యలు చేస్తూ, మహిళలను వస్తువుల్లా చూపించే విధంగా కంటెంట్‌ను ప్రసారం చేస్తున్నాడని ఫిర్యాదుల్లో పేర్కొన్నారు.

అదేవిధంగా, ఆ ఛానల్‌లో ప్రసారం చేసిన కొన్ని వీడియోలలో చట్టవిరుద్ధ అంశాలు, ముఖ్యంగా బాలల హక్కులకు భంగం కలిగించేలా ఉన్న కంటెంట్ ఉందని, సంబంధిత చట్టాల ప్రకారం నేరాలకు దారితీసే అంశాలు ఉన్నాయని ఆరోపణలు వచ్చాయి. ఈ విషయాలకు సంబంధించిన వీడియో లింకులు మరియు ఖాతా వివరాలను కమిషన్ పరిశీలన కోసం సేకరించింది. ఇంకా, హిందూ దేవతలపై కూడా అత్యంత అభ్యంతరకరమైన, అసభ్యమైన మరియు భావోద్వేగాలను దెబ్బతీసే వ్యాఖ్యలు చేసినట్లు ఫిర్యాదులు అందాయి. ఇటువంటి వ్యాఖ్యలు ప్రజా నైతికతను, సామాజిక సమతుల్యతను దెబ్బతీసేలా ఉన్నాయని కమిషన్ అభిప్రాయపడుతోంది.

సదరు ఇన్‌ఫ్లుయెన్సర్ ప్రస్తుతం భారతదేశం వెలుపల నివసిస్తున్నట్లు గుర్తించిన నేపథ్యంలో, ఈ వ్యవహారాన్ని కేంద్రస్థాయి ఉన్నత అధికార సంస్థ అయిన జాతీయ మహిళా కమిషన్ (NCW) కు తెలంగాణ రాష్ట్ర మహిళా కమిషన్ పంపించడం జరిగింది. చట్టపరంగా అవసరమైన చర్యలు తీసుకోవడం, సంబంధిత వ్యక్తిని హాజరు పరచే అధికారం జాతీయ మహిళా కమిషన్‌కు ఉన్నందున, ఈ అంశాన్ని అక్కడికి పంపినట్లు కమిషన్ తెలిపింది.

మహిళల గౌరవం, ప్రజా నైతికత మరియు సామాజిక విలువలను పరిరక్షించాల్సిన అవసరం దృష్ట్యా, ఈ వ్యవహారంపై అత్యంత సీరియస్‌గా పరిగణించి, అవసరమైతే కఠినమైన మరియు చట్టబద్ధమైన చర్యలు తీసుకోవాల్సిందిగా కోరుతూ, తెలంగాణ రాష్ట్ర మహిళా కమిషన్ ఈ అంశాన్ని జాతీయ మహిళా కమిషన్‌కు పంపినట్లు తెలిపింది.