ఇండిగో విమానానికి బాంబు బెదిరింపు

కువైట్ నుండి హైదరాబాద్‌కు బయలుదేరిన ఇండిగో విమానం పై మంగళవారం తెల్లవారుజామున బాంబు ఉందంటూ ఢిల్లీ ఎయిర్‌పోర్ట్ ఉన్నతాధికారులకు ఈమెయిల్ ద్వారా బెదిరింపు వచ్చింది. సమాచారం అందిన వెంటనే అధికారులు పైలెట్‌ను అప్రమత్తం చేశారు. శంషాబాద్ ఎయిర్‌పోర్ట్‌లో ల్యాండ్ కావాల్సిన ఈ విమానాన్ని అత్యవసరంగా ముంబైకి మళ్లించారు.

ముంబై ఎయిర్‌పోర్ట్‌లో ల్యాండ్ అయిన తరువాత ప్రయాణికులను వెంటనే విమానం నుంచి దింపి భద్రతా ప్రాంతానికి తరలించారు. అనంతరం బాంబు స్క్వాడ్ మరియు భద్రతా బృందాలు విమానంలో ముమ్మర తనిఖీలు ప్రారంభించాయి. మాములుగా ఈ ఇండిగో ఫ్లైట్ ఉదయం 8.10 గంటలకు శంషాబాద్ ఎయిర్‌పోర్ట్ చేరాల్సి ఉంది.

బాంబు బెదిరింపు కారణంగా విమానంలోని ప్రయాణికులు, సిబ్బంది తీవ్ర ఆందోళనకు గురయ్యారు. ఈ ఘటన పై శంషాబాద్ మరియు ముంబై ఎయిర్‌పోర్ట్ అధికారులు పరిస్థితిని సమీక్షిస్తున్నారు. విమానంలో ఉన్న ప్రయాణికుల సంఖ్య లేదా సిబ్బంది వివరాలు ఇండిగో సంస్థ అధికారికంగా వెల్లడించలేదు.