నేటి నుంచి చార్మినార్‌ వద్ద ట్రాఫిక్ ఆంక్షలు

దీపావళి పండుగ సందర్భంగా హైదరాబాద్‌లోని భాగ్యలక్ష్మి ఆలయానికి భక్తుల రద్దీ పెరిగే అవకాశం ఉండటంతో చార్మినార్‌ పరిసరాల్లో నేటి నుంచి ట్రాఫిక్‌ ఆంక్షలు అమల్లోకి రానున్నాయి. ఈ నెల 11వ తేదీ వరకు ఈ ఆంక్షలు కొనసాగనున్నాయి. పండుగ సమయంలో వాహనాల రాకపోకలను క్రమబద్ధీకరించడంతో పాటు చార్మినార్‌ పరిసర ప్రాంతాల్లో ట్రాఫిక్‌ రద్దీని నియంత్రించేందుకు ట్రాఫిక్‌ పోలీసులు ఈ చర్యలు చేపట్టారు.

మదీనా–చార్మినార్‌, ముర్గీ చౌక్‌–చార్మినార్‌, షాలిబండ–చార్మినార్‌ మార్గాల్లో ట్రాఫిక్‌ ఆంక్షలు విధించనున్నారు. ఈ మార్గాల్లో ప్రయాణించే వాహనదారులు ముందుగానే తమ ప్రయాణాలను ప్లాన్‌ చేసుకోవాలని, అవసరమైతే ప్రత్యామ్నాయ మార్గాలను ఎంచుకోవాలని సూచించారు. ట్రాఫిక్‌ పోలీసుల సూచనలు పాటిస్తూ సహకరించాలని అధికారులు వాహనదారులను కోరుతున్నారు.