కేంద్ర ప్రభుత్వంపై ఒవైసీ తీవ్ర విమర్శలు

ముస్లిం విద్యార్థులకు కేంద్రంలోని మోదీ ప్రభుత్వం గత నాలుగేళ్లుగా ప్రీ మెట్రిక్‌, పోస్టు మెట్రిక్‌, మెరిట్‌ కమ్‌ మీన్స్‌ స్కాలర్‌షిప్‌ పథకాలను నిలిపివేసిందని మజ్లిస్‌ అధినేత అసదుద్దీన్‌ ఒవైసీ విమర్శించారు. మజ్లిస్‌ చారిటీ తరఫున గత 21 ఏళ్లుగా రూ.10.50 కోట్ల విలువైన ఆర్థిక సహాయం అందించామని, ఈ ఏడాది విద్యార్థులకు రూ.86 లక్షలు పంపిణీ చేశామని తెలిపారు. కేంద్ర ప్రభుత్వ విధానాల కారణంగా ముస్లిం విద్యార్థుల్లో డ్రాపౌట్‌ రేటు పెరుగుతోందని ఒవైసీ ఆరోపించారు.

యూడైస్‌ గణాంకాల ప్రకారం ముస్లిం విద్యార్థుల డ్రాపౌట్‌ రేటు ప్రాథమిక స్థాయిలో 8 శాతం, మాధ్యమిక స్థాయిలో 6 శాతం, ఉన్నత విద్యలో 4 శాతంగా ఉందని ఆయన పేర్కొన్నారు. ఇదిలా ఉండగా, ఉర్దూ మాధ్యమ పాఠశాలల్లో పదో తరగతి చదువుతున్న 1,700 మంది విద్యార్థుల పరీక్ష ఫీజులను మజ్లిస్‌ చారిటీ తరఫున చెల్లించారు. గురువారం దారుసలాంలో పాఠశాలల ప్రధానోపాధ్యాయులకు ఫీజుల చెక్కును అందజేశారు.