వీబీజీరామ్‌జీ పథకం అమలుపై తెలంగాణ ప్రభుత్వాన్ని ప్రశంసించిన కేంద్ర మంత్రి

తెలంగాణలో వీబీజీరామ్‌జీ పథకం అమలు తీరుపై కేంద్ర గ్రామీణాభివృద్ధి, వ్యవసాయశాఖ మంత్రి శివరాజ్‌సింగ్‌ చౌహాన్‌ ప్రశంసలు కురిపించారు. ఈ మేరకు పంచాయతీరాజ్‌, గ్రామీణాభివృద్ధిశాఖ మంత్రి సీతక్కకు గురువారం లేఖ రాశారు. వీబీజీరామ్‌జీ పథకం అమలుకు సంబంధించి రాష్ట్ర ప్రభుత్వం చేసిన పలు సూచనలపై స్పందిస్తూ ఆయన ఈ లేఖ పంపించారు. ఈ పథకం కింద తెలంగాణలో ఇప్పటివరకు 1.83 కోట్ల పనిదినాలు కల్పించడాన్ని, రాష్ట్రంలోని అన్ని గ్రామ పంచాయతీల్లో పనులు చేపట్టడాన్ని కేంద్ర మంత్రి అభినందించారు.

గ్రామీణ కుటుంబాలకు ఉపాధి అవకాశాలు కల్పించడంతోపాటు, చట్టంలోని నిబంధనలను క్షేత్రస్థాయిలో సమర్థవంతంగా అమలు చేయడంలో రాష్ట్ర ప్రభుత్వ నిబద్ధత కనిపిస్తోందని చౌహాన్‌ పేర్కొన్నారు. 2026–27 ఆర్థిక సంవత్సరానికి తెలంగాణకు కేంద్ర ప్రభుత్వం రూ.3,825.3 కోట్ల నిధులు కేటాయించినట్లు తెలిపారు. రాష్ట్ర ప్రభుత్వం ప్రతిపాదించిన అదనపు పనులను పరిశీలించిన అనంతరం వీబీజీరామ్‌జీ పథకం కింద అనుమతించదగిన పనుల జాబితాను 375 పనులకు విస్తరించినట్లు వెల్లడించారు. తెలంగాణ ప్రభుత్వం ప్రతిపాదించిన రాష్ట్ర గృహ నిర్మాణ పథకంతోపాటు, రాష్ట్రం సూచించిన మరికొన్ని పనులను కూడా ఈ జాబితాలో చేర్చినట్లు తన లేఖలో వివరించారు.