భవానీ దీక్షల కోసం విజయవాడ దుర్గమ్మ ఆలయంలో ప్రత్యేక ఏర్పాట్లు

విజయవాడ ఇంద్రకీలాద్రిపై ఈ నెల 20వ తేదీ నుంచి భవానీ దీక్షల మాలధారణ కార్యక్రమం ప్రారంభం కానుంది. వచ్చే ఏడాది జనవరి 3వ తేదీన దీక్షా విరమణ కార్యక్రమాలు ముగియనున్నాయి. కార్తీక శుద్ధ ఏకాదశి రోజైన నవంబర్‌ 20న ఉదయం 8.45 గంటలకు మండల దీక్షాధారణ ప్రారంభమై, నవంబర్‌ 24వ తేదీతో ముగుస్తుంది. అర్ధ మండల దీక్షాధారణ డిసెంబర్‌ 10న ప్రారంభమై, డిసెంబర్‌ 14వ తేదీతో ముగియనుంది. భవానీ దీక్షలు చేపట్టే భక్తుల కోసం ఈ కార్యక్రమాల్లో భాగంగా వివిధ ఆధ్యాత్మిక, పూజా కార్యక్రమాలు నిర్వహించనున్నారు.

డిసెంబర్‌ 24వ తేదీ సాయంత్రం 6.30 గంటలకు సత్యనారాయణపురంలోని శ్రీ శృంగేరి శారదా పీఠం పరిపాలనలో ఉన్న శ్రీ శివరామకృష్ణ క్షేత్రం నుంచి కలశ జ్యోతి ఉత్సవం ప్రారంభమవుతుంది. డిసెంబర్‌ 30 నుంచి జనవరి 3వ తేదీ వరకు మండల దీక్ష విరమణ కార్యక్రమాలు నిర్వహిస్తారు. జనవరి 3వ తేదీ ఉదయం 6.30 గంటలకు అగ్ని ప్రతిష్ఠాపన, శత చండీయాగం, గిరి ప్రదక్షిణ కార్యక్రమాలు జరగనున్నాయి. అదే రోజు పూర్ణాహుతితో భవానీ దీక్షల విరమణ కార్యక్రమం పూర్తవుతుంది.