ఏపీలో ఏడు చోట్ల నేడు ఎంపీటీసీ, జెడ్పీటీసీ ఎన్నికల రీపోలింగ్

ఆంధ్రప్రదేశ్‌లో ఎంపీటీసీ, జెడ్పీటీసీ ఎన్నికల్లో భాగంగా నేడు ఏడు ప్రాంతాల్లో రీపోలింగ్ నిర్వహిస్తున్నారు. గతంలో జరిగిన పోలింగ్ సమయంలో రిగ్గింగ్‌, పోలింగ్‌ కేంద్రాలపై దాడులు, బ్యాలెట్‌ బాక్సుల అపహరణ వంటి ఘటనలు చోటుచేసుకోవడంతో ఎన్నికల అధికారులు ఈ నిర్ణయం తీసుకున్నారు. అనంతపురం, మార్కాపురం, పల్నాడు, కర్నూలు, శ్రీకాకుళం జిల్లాల్లోని ప్రభావిత పోలింగ్‌ కేంద్రాల్లో తిరిగి ఓటింగ్‌ నిర్వహించేందుకు ఏర్పాట్లు చేశారు.

అనంతపురం జిల్లా చిత్రచెడు గ్రామంలోని 46, 47 పోలింగ్‌ బూత్‌లతో పాటు మారుట్లలోనూ రీపోలింగ్‌ జరుగుతోంది. కర్నూలు జిల్లా కోసిగి మండలం ఆర్లబండలో, శ్రీకాకుళం మండలం పొన్నాం గ్రామంలోనూ ఓటర్లు తిరిగి ఓటు హక్కు వినియోగించుకోనున్నారు. మార్కాపురం జిల్లా గంగవరం గ్రామంలోని 5వ బూత్‌, పల్నాడు జిల్లా అందుకూరు గ్రామంలోని 43వ పోలింగ్‌ బూత్‌లోనూ రీపోలింగ్‌ నిర్వహిస్తున్నారు. ఈ రోజు ఉదయం 7 గంటల నుంచి సాయంత్రం 5 గంటల వరకు ఓటింగ్‌ కొనసాగనుంది.