ఢిల్లీలో సీఈసీ జ్ఞానేశ్ కుమార్ రాజీనామాకు డిమాండ్.. కొనసాగుతున్న నిరసనలు

కేంద్ర ఎన్నికల సంఘం ప్రధాన ఎన్నికల కమిషనర్‌ (సీఈసీ) జ్ఞానేశ్ కుమార్ రాజీనామా చేయాలని డిమాండ్ చేస్తూ దేశ రాజధాని ఢిల్లీలో నిరసనలు కొనసాగుతున్నాయి. ఈ నేపథ్యంలో నగరంలో ఉద్రిక్త పరిస్థితులు నెలకొన్నాయి. మరోవైపు కేంద్ర ఎన్నికల సంఘం పనితీరు, ఓటర్ల జాబితా ప్రత్యేక సమగ్ర సవరణ (ఎస్‌ఐఆర్) ప్రక్రియపై దాఖలైన పిటిషన్లను సుప్రీంకోర్టు నేడు విచారించనుంది. ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం జ్ఞానేశ్ కుమార్ పనితీరు, వ్యవహారాలపై ప్రత్యేక దర్యాప్తు సంస్థతో విచారణ జరిపించాలని కోరుతూ దాఖలైన పిటిషన్‌తో పాటు ఎస్‌ఐఆర్ ప్రక్రియను అక్రమంగా ప్రకటించాలంటూ దాఖలైన పిటిషన్లను పరిశీలించనుంది.

మరోవైపు, కేంద్ర ఎన్నికల సంఘం, ఎస్‌ఐఆర్ ప్రక్రియపై దేశవ్యాప్తంగా చేపట్టాల్సిన ఆందోళన కార్యక్రమాలపై చర్చించేందుకు కాంగ్రెస్ పార్టీ సాయంత్రం ఏఐసీసీ ప్రధాన కార్యదర్శులు, అన్ని రాష్ట్రాల పీసీసీ అధ్యక్షులతో సమావేశం నిర్వహించనుంది. రేపు ఢిల్లీలో ఇండియా కూటమి ఎంపీలు నిరసన ప్రదర్శన చేపట్టేందుకు సిద్ధమవుతున్నారు. ఉదయం 10 గంటలకు పార్లమెంట్‌లోని మకర ద్వారం నుంచి కేంద్ర ఎన్నికల సంఘం కార్యాలయం వరకు ర్యాలీ నిర్వహించేందుకు సన్నాహాలు చేస్తున్నారు. ఇదిలా ఉండగా, కేరళ పీడబ్ల్యూడీ కార్యదర్శిగా పనిచేసిన సమయంలో వచ్చిన ఆరోపణలపై జ్ఞానేశ్ కుమార్‌పై ఇప్పటికే కేరళ ప్రభుత్వం విచారణకు ఆదేశించింది.