నేడు చంద్రబాబు సమక్షంలో మెగా డిఫెన్స్ ప్రాజెక్ట్ ప్రారంభం

రాయలసీమ ప్రాంతం ఇకపై రక్షణ రంగంలో కీలక కేంద్రంగా మారనుంది. సత్యసాయి జిల్లా పుట్టపర్తిలో రూ.15,803 కోట్ల వ్యయంతో ఏర్పాటు చేయనున్న అత్యాధునిక మధ్యతరహా యుద్ధ విమానాల ప్రాజెక్టుకు ఇవాళ భూమి పూజ జరగనుంది. ఈ కార్యక్రమంలో రక్షణ శాఖ మంత్రి రాజ్‌నాథ్‌ సింగ్, ఆంధ్రప్రదేశ్ ముఖ్యమంత్రి చంద్రబాబు నాయుడు పాల్గొననున్నారు. ఈ ప్రాజెక్టుతో సుమారు 7,500 మందికి ఉపాధి అవకాశాలు లభించనున్నాయి.

ఏరోనాటికల్ అభివృద్ధి సంస్థ, రక్షణ పరిశోధన అభివృద్ధి సంస్థ సంయుక్తంగా చేపడుతున్న ఈ ప్రాజెక్టు కోసం 650 ఎకరాల భూమిని సేకరించారు. ఈ ప్రాజెక్టులో భాగంగా దేశంలోనే తొలి ఐదో తరం స్టెల్త్ బహుళ ప్రయోజన యుద్ధ విమానాలను అభివృద్ధి చేయనున్నారు. స్టెల్త్ సాంకేతికత, ద్వంద్వ ఇంజిన్ వ్యవస్థ, సూపర్ క్రూయిజ్ సామర్థ్యాలు ఈ యుద్ధ విమానాల ప్రత్యేకతగా నిలవనున్నాయి. ఈ ప్రాజెక్టుతో పాటు అనుబంధ పరిశ్రమల ద్వారా లక్ష కోట్ల రూపాయల పెట్టుబడులు వచ్చే అవకాశం ఉందని ప్రభుత్వం అంచనా వేస్తోంది.