మనీలాండరింగ్‌ కట్టడికి కొత్త ప్లాట్‌ఫామ్‌..

దేశంలోని పోర్ట్‌ఫోలియో మేనేజ్‌మెంట్‌ సర్వీసెస్‌ (పీఎంఎస్‌) రంగంలో మనీలాండరింగ్‌ నిరోధక తనిఖీలు, నిరంతర పర్యవేక్షణను బలోపేతం చేసేందుకు ‘ఇన్‌ప్రో’ వేదికను అందుబాటులోకి తీసుకొచ్చారు. కేఫిన్‌ టెక్నాలజీస్, అసోసియేషన్‌ ఆఫ్‌ పోర్ట్‌ఫోలియో మేనేజర్స్‌ ఇండియా సంయుక్తంగా ఈ వేదికను రూపొందించాయి. ముంబయిలో జరిగిన సంఘం మూడో వార్షిక సదస్సులో సెబీ ఛైర్మన్‌ తుహిన్‌ కాంత పాండే దీనిని ప్రారంభించారు.

ఖాతాదారుల నమోదు సమయంలోనే కాకుండా, ఆ తర్వాత కూడా వారి వివరాలను నిరంతరం పర్యవేక్షించేందుకు ఇన్‌ప్రో ఉపయోగపడుతుంది. అంతర్జాతీయ ఆంక్షల జాబితాలు, భారత్‌లో నిషేధిత వ్యక్తులు, రాజకీయంగా ప్రభావిత వ్యక్తుల వివరాలు, నియంత్రణ సంస్థల పర్యవేక్షణ జాబితాలు, ప్రతికూల వార్తలను పరిశీలించే సదుపాయం ఇందులో ఉంది. మనీలాండరింగ్‌ నిరోధక తనిఖీలు, హెచ్చరికల నిర్వహణ, కేసుల సమీక్ష, తనిఖీ వివరాలను ఒకే వేదికపై అందుబాటులోకి తీసుకురావడం ద్వారా చిన్న, పెద్ద పీఎంఎస్‌ సంస్థలకు ఈ సాంకేతికత ఉపయోగపడనుంది.