ఇన్‌స్టాగ్రామ్‌లో కొత్త MUSE ఆప్షన్.. ఈ పర్సనల్ AI ఏజెంట్ ఏం చేస్తుందంటే!

కొంతమంది ఇన్‌స్టాగ్రామ్ యూజర్లకు షేర్ మెనూలో MUSE అనే కొత్త ఆప్షన్ కనిపిస్తోంది. తొలిచూపులో ఇది పోస్టులు లేదా రీల్స్‌ను షేర్ చేసేందుకు సంబంధించిన ఫీచర్‌లా అనిపించినప్పటికీ, వాస్తవానికి ఇది మెటా రూపొందించిన పర్సనల్ AI ఏజెంట్. సాధారణ చాట్‌బాట్‌లా ప్రశ్నలకు సమాధానాలు ఇవ్వడంతో పాటు, ఒక పనికి సంబంధించిన అనేక దశలను అర్థం చేసుకుని వాటిని ప్లాన్ చేయడం, నిర్వహించడంలో యూజర్లకు సహాయపడేలా MUSEను రూపొందించారు. ప్రస్తుతం దీని లభ్యత ప్రాంతాన్ని బట్టి మారుతోంది. భారత్‌లో ఈ ఫీచర్ యాక్సెస్ ఇంకా అందుబాటులోకి రాలేదు.

టికెట్ల ధరలను గమనించడం, సరైన సమయంలో రిజర్వేషన్ చేసుకోవడం, ఈమెయిల్ ద్వారా వచ్చిన ఫారాలను పూర్తి చేయడం, తదుపరి ప్రక్రియను అర్థం చేసుకోవడం వంటి పనుల్లో MUSE సహాయపడగలదు. అవసరమైన పనులకు రిమైండర్లు సెట్ చేయడంలోనూ ఉపయోగపడుతుంది. అలాగే ఖర్చులను పరిశీలించి సేవింగ్స్‌కు అవకాశాలను గుర్తించడం, అవసరం లేని పెయిడ్ సబ్‌స్క్రిప్షన్లను గుర్తించడం వంటి ఆర్థిక నిర్వహణ పనుల్లోనూ ఇది ఉపయోగపడుతుంది. అయితే చెల్లింపులు లేదా ఖర్చులకు తుది నిర్ణయం మాత్రం యూజర్‌దే. డిన్నర్ రిజర్వేషన్, మారథాన్ ప్రిపరేషన్, కొత్త కారు కోసం సేవింగ్స్ వంటి పెద్ద లక్ష్యాలను దశలవారీగా ప్లాన్ చేయడంలోనూ MUSE సహాయం చేయగలదు. Gmail, Google Calendar, Health, Facebook, Instagram, Peloton, ఫైనాన్స్ వంటి సేవలతో కనెక్ట్ అయ్యే అవకాశం ఉంది. అయితే కనెక్షన్లు, ఫీచర్ల లభ్యత యూజర్ ప్రాంతం మరియు సంబంధిత సేవలపై ఆధారపడి ఉంటుంది.