

‘అశోక్’, ‘జై చిరంజీవ’, ‘సూర్య సన్ ఆఫ్ కృష్ణన్’ వంటి చిత్రాలతో తెలుగు ప్రేక్షకులకు కూడా దగ్గరైన నటి సమీరా రెడ్డి తాజాగా ఓ ఇంటర్వ్యూలో తన సినీ ప్రయాణం గురించి ఆసక్తికర విషయాలు పంచుకున్నారు. బాలీవుడ్తో పోలిస్తే దక్షిణాది చిత్ర పరిశ్రమ నుంచే తనకు ఎక్కువ గౌరవం, అభిమానుల ప్రేమ లభించాయని తెలిపారు. హిందీ సినిమాల్లో నటించినప్పటికీ తనను తాను దక్షిణాది నటిగానే భావిస్తానని చెప్పారు. ముఖ్యంగా ‘సూర్య సన్ ఆఫ్ కృష్ణన్’లో తాను పోషించిన మేఘన పాత్రను 18 ఏళ్ల తర్వాత కూడా ప్రేక్షకులు గుర్తుపెట్టుకుని ఆప్యాయంగా పలకరించడం ఎంతో ఆనందాన్ని ఇస్తోందని పేర్కొన్నారు. దక్షిణాదిలో తాను నటించిన సినిమాలు ఎప్పటికీ తన హృదయానికి దగ్గరగా ఉంటాయని చెప్పారు.
తన తొలి చిత్రం ‘మైనే దిల్ తుఝ్కో దియా’ (2002) సమయంలో ఎదురైన అనుభవాలను కూడా సమీరా గుర్తుచేసుకున్నారు. తన చర్మం తెల్లగా కనిపించేందుకు రెండు, మూడు షేడ్లు ఎక్కువగా మేకప్ వేసేవారని వెల్లడించారు. అందం విషయంలో సమాజంలో ఉన్న పరిమిత ఆలోచనా విధానాన్ని ప్రశ్నించిన ఆమె.. చర్మం రంగు, శరీరాకృతి ఆధారంగా మహిళలను విమర్శించడం సరికాదన్నారు. సొంత కుటుంబాల్లోనే తల్లిదండ్రులు, అత్తమామల నుంచి కూడా ఇలాంటి వివక్షను చాలామంది మహిళలు ఎదుర్కొంటున్నారని ఆవేదన వ్యక్తం చేశారు. ఇక సినిమాల విషయానికొస్తే.. ఇటీవల ‘ఆఖ్రీ సవాల్’ చిత్రంలో నటించిన సమీరా, ప్రస్తుతం సోషల్మీడియా కంటెంట్ క్రియేటర్గా, ఇన్ఫ్లుయెన్సర్గా కూడా కొనసాగుతున్నారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!