

రాష్ట్ర ప్రభుత్వం అమలు చేస్తున్న సంక్షేమ పథకాలు, సాధించిన అభివృద్ధి విజయాలను ప్రతి ఇంటికీ తీసుకెళ్లాలని నీటిపారుదల, పౌరసరఫరాల శాఖ మంత్రి కెప్టెన్ ఎన్. ఉత్తమ్ కుమార్ రెడ్డి కాంగ్రెస్ నాయకులు, కార్యకర్తలకు పిలుపునిచ్చారు. ఆదివారం హైదరాబాద్లోని గాంధీభవన్లో జరిగిన తెలంగాణ ప్రదేశ్ కాంగ్రెస్ కమిటీ విస్తృత కార్యవర్గ సమావేశంలో ఆయన మాట్లాడుతూ.. సామాజిక న్యాయం, ప్రజా సంక్షేమమే కాంగ్రెస్ పార్టీకి పునాదులని పేర్కొన్నారు. ఈ సమావేశంలో ముఖ్యమంత్రి ఏ. రేవంత్ రెడ్డి, పీసీసీ అధ్యక్షుడు మహేశ్ కుమార్ గౌడ్తో పాటు పలువురు సీనియర్ నాయకులు పాల్గొన్నారు. అంకితభావంతో పనిచేసే క్షేత్రస్థాయి కార్యకర్తలకు పార్టీలో ఉన్నత స్థాయికి ఎదిగే అవకాశాలు ఉంటాయని ఉత్తమ్ కుమార్ రెడ్డి తెలిపారు. ప్రజలకు ఇచ్చిన హామీలను ప్రభుత్వం అమలు చేస్తోందని, కొత్త రేషన్ కార్డుల జారీ, అర్హులకు ఉచితంగా సన్నబియ్యం పంపిణీ ఇందుకు నిదర్శనమని అన్నారు.
తెలంగాణలో రికార్డు స్థాయిలో వరి, ఇతర పంటల ఉత్పత్తికి గత కాంగ్రెస్ ప్రభుత్వాలు నిర్మించిన సాగునీటి ప్రాజెక్టులే ప్రధాన ఆధారమని మంత్రి పేర్కొన్నారు. కృష్ణా, గోదావరి పరీవాహక ప్రాంతాల్లోని ఈ ప్రాజెక్టులు ఇప్పటికీ రైతులకు సాగునీరు అందిస్తున్నాయని చెప్పారు. భారీగా ఖర్చు చేసినప్పటికీ కాళేశ్వరం ప్రాజెక్టు ఆశించిన ప్రయోజనాలను అందించడం లేదని విమర్శించారు. ప్రాజెక్టును పునరుద్ధరించి ప్రజలకు ఉపయోగపడేలా చేయడానికి మరింత ఖర్చు చేయాల్సి ఉంటుందని తెలిపారు. ఎల్నినో పరిస్థితులు, నీటి లభ్యతపై ప్రభుత్వం అప్రమత్తంగా ఉందని, వచ్చే వర్షాకాలం వరకు తాగునీరు, ఇతర అత్యవసర అవసరాలకు ఇబ్బందులు తలెత్తకుండా సమగ్ర కార్యాచరణ ప్రణాళిక సిద్ధం చేస్తున్నామని వెల్లడించారు. కరవు ప్రభావాన్ని తగ్గించేందుకు చర్యలు తీసుకుంటున్నామని, ప్రజలు ఆందోళన చెందాల్సిన అవసరం లేదని భరోసా ఇచ్చారు. ప్రభుత్వ పథకాలు, విజయాలను ప్రజల్లోకి తీసుకెళ్లాలని పార్టీ శ్రేణులను కోరారు.























కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!