ఇన్‌స్టాగ్రామ్‌లో సీఎస్‌ఏఎం ప్రకటనల వివాదం.. మెటాకు కేంద్రం నోటీసు

ఇన్‌స్టాగ్రామ్‌లో చిన్నారుల లైంగిక దుర్వినియోగానికి సంబంధించిన అక్రమ కంటెంట్ (CSAM)ను ప్రోత్సహించే చెల్లింపు ప్రకటనలు ఆమోదించబడినట్లు బీబీసీ వరల్డ్ సర్వీస్ ఐ దర్యాప్తులో వెలుగులోకి రావడంతో కేంద్ర ఎలక్ట్రానిక్స్ మరియు సమాచార సాంకేతిక మంత్రిత్వ శాఖ (MeitY) మెటాకు నోటీసు జారీ చేసింది. ఈ ప్రకటనలు టెలిగ్రామ్ ఛానళ్లకు వినియోగదారులను మళ్లించాయని ఆరోపణలు రావడంతో మెటా ప్రకటనల పరిశీలన వ్యవస్థపై తీవ్ర ఆందోళనలు వ్యక్తమయ్యాయి.

సీఎస్‌ఏఎం సంబంధిత అన్ని ప్రకటనలు, కంటెంట్‌ను వెంటనే తొలగించాలని కేంద్రం ఆదేశిస్తూ, అవి ఎలా ఆమోదం పొందాయనే విషయంపై మెటా నుంచి వివరణ కోరింది. చిన్నారుల లైంగిక దుర్వినియోగ కంటెంట్‌పై తమకు జీరో టాలరెన్స్ విధానం ఉందని తెలిపిన మెటా, సంబంధిత ప్రకటనలు మరియు ఖాతాలను తొలగించి, ఏఐ ఆధారిత భద్రతా వ్యవస్థలను మరింత బలోపేతం చేస్తున్నట్లు వెల్లడించింది. ఈ ఘటనతో డిజిటల్ ప్లాట్‌ఫారమ్‌ల బాధ్యతపై చర్చ మరింత వేగం అందుకుంది.