ఆర్చరీ ప్రీమియర్ లీగ్‌లో రాజ్‌పుతానా రాయల్స్ శుభారంభం...

ఆర్చరీ ప్రీమియర్ లీగ్ (ఏపీఎల్)లో డిఫెండింగ్ ఛాంపియన్ రాజ్‌పుతానా రాయల్స్ విజయంతో తమ ప్రయాణాన్ని ప్రారంభించింది. గురువారం హైదరాబాద్‌లోని పీపుల్స్ ప్లాజాలో జరిగిన తొలి మ్యాచ్‌లో పృథ్వీరాజ్ యోధాస్‌పై 5-3తో విజయం సాధించింది. తొలి సెట్‌ను రాజ్‌పుతానా 75-69తో గెలుచుకోగా, రెండో సెట్‌లో యోధాస్ 74-43తో నెగ్గి స్కోరును సమం చేసింది. మూడో సెట్ 77-77తో టై కావడంతో నాలుగో సెట్ కీలకంగా మారింది. హోరాహోరీగా సాగిన పోరులో రాజ్‌పుతానా రాయల్స్ పైచేయి సాధించి మ్యాచ్‌ను సొంతం చేసుకుంది. మరో ఉత్కంఠభరిత పోరులో కాకతీయ నైట్స్ 4-4తో సమంగా నిలిచిన అనంతరం షూటాఫ్‌లో 2-0తో మైటీ మరాఠాస్‌ను ఓడించింది. ఒక దశలో 4-0తో ఆధిక్యంలో ఉన్న మరాఠాస్‌కు నిరాశ ఎదురైంది. ధీరజ్ బొమ్మదేవర ఆరంభంలో రాణించినప్పటికీ, అతడి స్థానంలో వచ్చిన మృనాల్ చౌహాన్ ఆశించిన స్థాయిలో ప్రదర్శన చేయకపోవడంతో కాకతీయ నైట్స్ పుంజుకుని విజయం సాధించింది.

మరో మ్యాచ్‌లో చేరో ఆర్చర్స్ 5-3తో చోళా చీఫ్స్‌ను ఓడించింది. తొలి సెట్‌ను 74-69తో, మూడో సెట్‌ను 79-75తో చేరో ఆర్చర్స్ గెలుచుకుంది. రెండో సెట్‌ను చోళా చీఫ్స్ 71-70తో కైవసం చేసుకుంది. నాలుగో సెట్ 73-73తో టై కావడంతో చేరో ఆర్చర్స్ విజయం ఖాయమైంది. అంతకుముందు తెలంగాణ క్రీడల మంత్రి వాకిటి శ్రీహరి ఆర్చరీ ప్రీమియర్ లీగ్‌ను అధికారికంగా ప్రారంభించారు. తొలి రోజే ఆసక్తికర పోటీలు, ఉత్కంఠభరిత ముగింపులతో లీగ్ అభిమానులను ఆకట్టుకుంది.