ఐపీఎల్ జట్టు ఎంపికలో యజమానుల హస్తం?.. లివింగ్‌స్టోన్ సంచలన వ్యాఖ్యలు

ఐపీఎల్ ఫ్రాంచైజీల జట్టు ఎంపికలో యజమానుల పాత్ర ఎంతవరకు ఉంటుందనే అంశంపై మరోసారి చర్చ మొదలైంది. సన్‌రైజర్స్ హైదరాబాద్ మాజీ ఆటగాడు లియామ్ లివింగ్‌స్టోన్ చేసిన వ్యాఖ్యలు ఈ చర్చకు ఊతమిచ్చాయి. ఐపీఎల్ 2026 సీజన్‌లో ఎస్‌ఆర్‌హెచ్ తరఫున కేవలం రెండు మ్యాచ్‌లు మాత్రమే ఆడిన లివింగ్‌స్టోన్, తాను జట్టులో స్థానం కోల్పోవడానికి యజమానుల అభిప్రాయం కూడా ఒక కారణమని పేర్కొన్నాడు. ఆ సీజన్‌లో అతను రెండు మ్యాచ్‌ల్లో 1, 14 పరుగులు మాత్రమే చేశాడు.

తాజాగా ఓ క్రికెట్ పోడ్‌కాస్ట్‌లో మాట్లాడిన లివింగ్‌స్టోన్, కెప్టెన్ పాట్ కమిన్స్ అందుబాటులో లేని సమయంలో కూడా తనకు అవకాశం రాకపోవడంపై కోచ్ డేనియల్ వెటోరి ను ప్రశ్నించినట్లు తెలిపాడు. జట్టు ప్రణాళికల్లో మార్పు ఉండదని కోచ్ సమాధానం ఇచ్చినట్లు వెల్లడించాడు. ఈ వ్యాఖ్యలు ఇప్పుడు ఐపీఎల్ వర్గాల్లో చర్చనీయాంశంగా మారాయి. సహ యజమాని కావ్య మారన్ కు చెందిన సన్‌రైజర్స్ హైదరాబాద్ జట్టు 2026 సీజన్‌లో ప్లేఆఫ్స్‌కు చేరుకున్నప్పటికీ, ఎలిమినేటర్‌లో రాజస్థాన్ రాయల్స్ చేతిలో ఓడిపోయింది. లివింగ్‌స్టోన్ వ్యాఖ్యలతో జట్టు ఎంపికలో యజమానుల పాత్రపై మళ్లీ చర్చ ప్రారంభమైంది.