బిగ్ బాస్ 10లోకి ఎంట్రీ ఎవరిది? కామనర్స్ రేసులో ఈ పేర్లే టాప్

తెలుగు బుల్లితెరపై అత్యంత ప్రజాదరణ పొందిన రియాలిటీ షో బిగ్ బాస్ మరోసారి సందడి చేసేందుకు సిద్ధమైంది. బిగ్ బాస్ తెలుగు సీజన్ 10 సెప్టెంబర్ 6న గ్రాండ్‌గా ప్రారంభం కానుండగా, నాగార్జున మరోసారి హోస్ట్‌గా ప్రేక్షకులను అలరించనున్నారు. గత సీజన్లకు భిన్నంగా ఈసారి “ఆటే సవాల్” అనే కాన్సెప్ట్‌తో షోను మరింత ఆసక్తికరంగా రూపొందించినట్లు తెలుస్తోంది. సెలబ్రిటీలతో పాటు సామాన్యులకు కూడా ఈ సీజన్‌లో ప్రత్యేక స్థానం కల్పిస్తున్నారు.

కామనర్స్‌ను ఎంపిక చేసేందుకు నిర్వహిస్తున్న అగ్నిపరీక్ష 2లో మొదట 15 మంది పోటీదారులు పాల్గొనగా, గాయత్రి ఇప్పటికే ఎలిమినేట్ అయ్యారు. దీంతో ప్రస్తుతం 14 మంది బిగ్ బాస్ హౌస్‌లోకి ఎంట్రీ కోసం పోటీ పడుతున్నారు. వీరిలో కేవలం ఐదారు మందికి మాత్రమే మెయిన్ హౌస్‌లోకి వెళ్లే అవకాశం దక్కనుంది.

సోషల్ మీడియాలో ప్రచారం జరుగుతున్న సమాచారం ప్రకారం ఝాన్సీ ఈ రేసులో ముందంజలో ఉన్నట్లు తెలుస్తోంది. అగ్నిపరీక్షలో ఆమె మాటతీరు, టాస్క్‌లు ఆడే విధానం నిర్వాహకుల దృష్టిని ఆకర్షించినట్లు సమాచారం. ఫిజికల్ టాస్క్‌లు, మైండ్ గేమ్స్‌లో తన ప్రతిభను చూపిస్తున్న రోహిత్ నాయుడు కూడా మెయిన్ హౌస్ ఎంట్రీకి దగ్గరగా ఉన్నట్లు ప్రచారం జరుగుతోంది.

మిగిలిన స్థానాల కోసం చరణ్, మిథిలేష్, రాజకుమారి, అమన్ మసూద్, షాలినీ, అపూర్వ, రామకృష్ణ పేర్లు ప్రధానంగా వినిపిస్తున్నాయి. అయితే తుది ఎంపికపై అధికారిక ప్రకటన రావాల్సి ఉంది. గతంలో కామనర్‌గా బిగ్ బాస్‌లోకి అడుగుపెట్టిన పల్లవి ప్రశాంత్ టైటిల్ గెలుచుకుని సంచలనం సృష్టించారు. అలాగే అగ్నిపరీక్ష ద్వారా వచ్చిన కళ్యాణ్ పడాల కూడా తనదైన ముద్ర వేశారు. దీంతో ఈసారి హౌస్‌లోకి వెళ్లే కామనర్స్ సెలబ్రిటీలకు గట్టి పోటీ ఇవ్వడం ఖాయమనే అంచనాలు వ్యక్తమవుతున్నాయి.