

రాష్ట్ర అభివృద్ధి, అంతర్జాతీయ స్థాయిలో తెలంగాణ ప్రఖ్యాతిని పెంచేందుకే హైదరాబాద్లో భారత్ సమిట్ నిర్వహించినట్లు మంత్రి పొంగులేటి శ్రీనివాసరెడ్డి తెలిపారు. సమిట్ వృథా అంటూ బీఆర్ఎస్ విమర్శలు చేయడం ఆ పార్టీ రాజకీయ సంస్కృతికి నిదర్శనమని మండిపడ్డారు. ఖమ్మం జిల్లా సత్తుపల్లి, వేంసూరులో మంగళవారం పింఛన్ పత్రాల పంపిణీ కార్యక్రమాలను ప్రారంభించి ఆయన మాట్లాడారు. గత బీఆర్ఎస్ ప్రభుత్వం తెలంగాణ ప్రజల సొమ్మును లక్షల కోట్ల రూపాయల మేర రాష్ట్రంలోనే కాకుండా ఇతర రాష్ట్రాలు, విదేశాల్లోనూ ఖర్చు చేసిందని ఆరోపించారు. కాంగ్రెస్ ప్రభుత్వం ప్రపంచవ్యాప్తంగా సంపద కలిగిన పారిశ్రామికవేత్తలు, పెట్టుబడిదారులను తెలంగాణకు ఆహ్వానించి రాష్ట్రాన్ని అన్ని రంగాల్లో అభివృద్ధి చేసేందుకు కృషి చేస్తోందని పేర్కొన్నారు.
సోనియాగాంధీని విమర్శిస్తున్న బీఆర్ఎస్ నేతలు, కాంగ్రెస్ నష్టపోతుందని తెలిసినా తెలంగాణ రాష్ట్రాన్ని ఏర్పాటు చేసిన ఆమె నిర్ణయాన్ని గుర్తుంచుకోవాలని పొంగులేటి సూచించారు. గత ప్రభుత్వ హయాంలో కాళేశ్వరం ప్రాజెక్టు నిర్మాణంలో భారీ అవినీతి జరిగిందని, కమీషన్లు దండుకున్నారని ఆరోపించారు. తమ ప్రభుత్వం పేదలకు ఇందిరమ్మ ఇళ్లు నిర్మించి ఇస్తోందని, డ్వాక్రా మహిళలకు రూ.73 వేల కోట్ల వడ్డీలేని రుణాలు అందించిందని, నిరుద్యోగులకు 73 వేల ఉద్యోగాలు కల్పించిందని వివరించారు. ఈ కార్యక్రమాల్లో ఎంపీ రామసహాయం రఘురాంరెడ్డి, ఎమ్మెల్యే మట్టా రాగమయి, జిల్లా కలెక్టర్ దివాకర తదితరులు పాల్గొన్నారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!