

రాష్ట్రంలో పంట రుణాల మాఫీపై విమర్శలు చేస్తున్న బీఆర్ఎస్ నేతలకు మాట్లాడే నైతిక హక్కు లేదని వ్యవసాయశాఖ మంత్రి తుమ్మల నాగేశ్వరరావు అన్నారు. దేశంలో ఎక్కడా లేని విధంగా రూ.2 లక్షల లోపు పంట రుణాలను ఒకే పంటకాలంలో మాఫీ చేశామని తెలిపారు. రైతులకు ప్రయోజనం చేకూరుస్తున్న కాంగ్రెస్ ప్రభుత్వ చర్యలను చూసి ఓర్వలేకనే భారాస నేతలు విమర్శలు చేస్తున్నారని ఆరోపించారు. మంగళవారం సచివాలయంలో నిర్వహించిన విలేకరుల సమావేశంలో ఆయన మాట్లాడుతూ.. అధికారంలో ఉన్నప్పుడు రూ.లక్ష రుణమాఫీని సైతం సక్రమంగా అమలు చేయలేని వారు ఇప్పుడు రైతులపై కపట ప్రేమ చూపిస్తున్నారని విమర్శించారు.
ఎన్నికల హామీ మేరకు కాంగ్రెస్ ప్రభుత్వం అధికారంలోకి వచ్చిన వెంటనే 25,35,964 మంది రైతులకు సంబంధించిన రూ.20,616.89 కోట్ల పంట రుణాలను మాఫీ చేసినట్లు తుమ్మల వెల్లడించారు. సిద్దిపేట నియోజకవర్గంలో రూ.2 లక్షల లోపు రుణాలు ఉన్న 20,772 మంది రైతులకు రూ.180 కోట్ల రుణమాఫీ జరిగిందని తెలిపారు. గత భారాస ప్రభుత్వ హయాంలో 2018లో సిద్దిపేట నియోజకవర్గంలో 34,160 మంది రైతులకు రూ.179 కోట్ల రుణాలు ఉండగా, కేవలం 16,197 మంది రైతులకు మాత్రమే రూ.96 కోట్ల రుణమాఫీ చేశారని పేర్కొన్నారు. గతంలో రుణమాఫీ సక్రమంగా చేయని భారాస నేతలు ఇప్పుడు విమర్శలు చేయడం విడ్డూరంగా ఉందన్నారు. సిద్దిపేటలో సీఎం బహిరంగ సభ జరగనున్న నేపథ్యంలో రైతులను తప్పుదోవ పట్టించేందుకు బీఆర్ఎస్ నేతలు ప్రయత్నిస్తున్నారని తుమ్మల ఆరోపించారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!