ఏపీ అసెంబ్లీలో హాట్‌ హాట్‌గా చర్చలు!

ఆంధ్రప్రదేశ్‌ అసెంబ్లీ సమావేశాలు ఈ నెల 17 నుంచి ప్రారంభం కానున్నాయి. రెండేళ్ల పాలనతో పాటు రాష్ట్రంలో శాంతిభద్రతలు, పెట్టుబడులు, ఉద్యోగాల కల్పన, జాబ్‌ క్యాలెండర్‌ తదితర అంశాలపై సభలో చర్చ జరిగే అవకాశం ఉంది. ప్రభుత్వం పలు కీలక బిల్లులను ప్రవేశపెట్టేందుకు సిద్ధమవుతోంది. బీసీ రిజర్వేషన్లతో పాటు మున్సిపల్‌ చట్ట సవరణ బిల్లును కూడా సభ ముందుకు తీసుకురానున్నట్లు సమాచారం.

మేయర్లు, మున్సిపల్‌ చైర్‌పర్సన్లకు ప్రత్యక్ష ఎన్నికలు నిర్వహించే అంశాన్ని ప్రభుత్వం పరిశీలిస్తున్నట్లు తెలుస్తోంది. ఈ నేపథ్యంలో మున్సిపల్‌ చట్టానికి సవరణలు చేసే అవకాశం ఉంది. ఈ నెల 17న సభ వాయిదా పడిన అనంతరం బిజినెస్‌ అడ్వైజరీ కమిటీ సమావేశం జరగనుంది. అసెంబ్లీ సమావేశాలను ఎన్ని రోజులు నిర్వహించాలనే అంశంపై ఈ సమావేశంలో నిర్ణయం తీసుకోనున్నారు.