స్పెషల్ స్కిల్స్ ఉన్న విదేశీ ఉద్యోగులకు వీసా రూల్స్ సవరించిన రష్యా...

విదేశీ నైపుణ్య కలిగిన వృత్తి నిపుణులను ఆకర్షించడానికి రష్యా కొత్త వీసా పథకాన్ని ప్రారంభించింది. ఈ వీసా ద్వారా వివిధ రంగాల్లో ప్రత్యేక నైపుణ్యాలు ఉన్న వ్యక్తులు మూడేళ్లపాటు తాత్కాలిక లేదా శాశ్వత నివాసం పొందే అవకాశం పొందగలరు.

రష్యా అధ్యక్షుడు వ్లాదిమిర్ పుతిన్ ఇటీవల భారత్‌ పర్యటనకు వచ్చారు. పర్యటనకు ముందే, ఈ కొత్త వీసా కార్యక్రమానికి సంబంధించిన అధికారిక ఉత్తర్వులపై సంతకాలు చేసినట్లు మీడియా కథనాలు పేర్కొంటున్నాయి.

ఈ వీసా పధకం ముఖ్యంగా భారత-రష్యా మొబిలిటీ ఒప్పందాన్ని బలోపేతం చేయడానికి రూపొందించబడింది. ఈ కొత్త వీసా 2026 ఏప్రిల్ 15 నుండి అందుబాటులోకి రానుంది. సైన్స్, ఆర్థిక, పారిశ్రామిక, విద్య, సాంస్కృతిక, వ్యాపార, క్రీడలు వంటి కీలక రంగాల నిపుణులు మరియు వారి కుటుంబ సభ్యులు దీని ద్వారా లాభం పొందవచ్చు.

వీరు రష్యా భాష పరీక్షలో ఉత్తీర్ణత సాధించకపోయినా, మూడేళ్లపాటు తాత్కాలిక నివాసానికి దరఖాస్తు చేసుకోవచ్చు. వీసా ప్రక్రియ రెండు దశలలో పూర్తి అవుతుంది:

1. అభ్యర్థులు ఏజెన్సీలలో దరఖాస్తు చేసుకుంటారు.

2. అర్హతను గుర్తించిన తర్వాత, వారు తాత్కాలిక లేదా శాశ్వత నివాసం కోసం దరఖాస్తు చేసుకోవచ్చు.

ఏజెన్సీ ఆమోదం ఏడాది పాటు చెల్లుబాటు అవుతుంది. అభ్యర్థులు, వారి కుటుంబ సభ్యులు ఆన్‌లైన్ ద్వారా దరఖాస్తు సమర్పించవచ్చు. ఆమోదం లభిస్తే, వారికి ఒక సంవత్సరానికి బిజినెస్ వీసా ఇవ్వబడుతుంది. తాత్కాలిక లేదా శాశ్వత నివాసం కోసం దరఖాస్తు పెండింగ్‌లో ఉన్నవారికి వర్క్ పర్మిట్ పొందే అవకాశాన్ని కూడా ఇస్తారు. ఇమిగ్రేషన్ అధికారులు అభ్యర్థుల దరఖాస్తులను 30 రోజులలోపే ప్రాసెస్ చేస్తారు.