న్యూ ఇయర్ వేడుకలకు పోలీసులు ఆంక్షలు.. పర్మిషన్ తప్పనిసరిగా తీసుకోవాల్సిందే!

న్యూ ఇయర్ 2026 వేడుకల నిర్వహణకు సైబరాబాద్ పోలీసులు కొత్త మార్గదర్శకాలు జారీ చేశారు. పబ్బులు, హోటల్స్, రిసార్టులు, కమ్యూనిటీ హాళ్లు, ఓపెన్ ఏరియాల్లో జరగబోయే అన్ని న్యూ ఇయర్ పార్టీలు, సంగీత కార్యక్రమాలకు ముందస్తు అనుమతి తప్పనిసరి చేశారు.

అనుమతి కోసం ఆర్గనైజర్లు డిసెంబర్ 21లోపు https://cybpms.telangana.gov.in వెబ్‌సైట్‌లో ఆన్‌లైన్‌ దరఖాస్తు చేయాలి. ఈవెంట్ వివరాలు, భద్రతా ఏర్పాట్లు, టైమింగ్స్, ఆడియో లెవెల్స్ తదితర విషయాలను పరిశీలించిన తర్వాతే అనుమతి మంజూరు చేస్తామని సైబరాబాద్ సీపీ శ్రీనివాస్ రెడ్డి స్పష్టం చేశారు.

అనుమతి లేకుండా ఈవెంట్ నిర్వహిస్తే కఠిన చర్యలు తప్పవని పోలీసులు హెచ్చరించారు. రాత్రి 1 గంట తర్వాత సంగీతం, ఆడియో సిస్టమ్స్ ఆపేయాలని, డ్రంక్ అండ్ డ్రైవ్, రౌడీజం నియంత్రణకు ప్రత్యేక బృందాలు ఏర్పాటు చేస్తున్నట్లు తెలిపారు.