లడ్డూ వివాదంపై ప‌వ‌న్‌ కల్యాణ్ ఆగ్రహం.. జ‌న‌సేన నేత‌ల‌కు గ‌ట్టిగా హెచ్చ‌రిక

తిరుమల లడ్డూ వివాదంపై జనసేన పార్టీ స్పందన బలహీనంగా ఉండటంపై పార్టీ అధ్యక్షుడు, ఉప ముఖ్యమంత్రి పవన్ కల్యాణ్ తీవ్ర అసంతృప్తి వ్యక్తం చేసినట్లు సమాచారం. ఇటీవల జరిగిన జనసేన జనరల్ బాడీ సమావేశంలో ఈ అంశం ప్రస్తావనకు రాగా, పార్టీ నేతలు మౌనంగా వ్యవహరించడంపై పవన్ కల్యాణ్ తీవ్రంగా ఆగ్రహం వ్యక్తం చేశారు. “ప్రతి అంశంపై నేను ఒక్కడినే మాట్లాడాలా? పార్టీ వాదనను ప్రజల్లోకి తీసుకెళ్లే బాధ్యత మీకూ లేదా?” అంటూ నాయకత్వంపై ఆయన గట్టిగా ప్రశ్నించినట్లు తెలుస్తోంది. తిరుమల లడ్డూ అంశంలో వైసీపీ ప్రచారం చేసిన కథనాలకు ఒక్క నాయకుడు కూడా తగిన ప్రతిస్పందన ఇవ్వలేదని అసంతృప్తి వ్యక్తం చేస్తూ, అన్ని స్థాయిల్లోనూ చురుకుదనం పెంచాలని ఆయన ఆదేశించారు. ఈ సందర్భంగా నాదెండ్ల మనోహర్‌కు నివేదిక సిద్ధం చేయాలని చెప్పి, సమావేశం మధ్యలోనే వెళ్లిపోయినట్లు సమాచారం.

అలాగే రైల్వే కోడూరు ఎమ్మెల్యేకు సంబంధించిన వివాదంపై కూడా పవన్ కల్యాణ్ స్పందించారు. పార్టీ నేతలు, ప్రజాప్రతినిధుల వ్యక్తిగత తప్పిదాలు పార్టీ ప్రతిష్టకు భంగం కలిగించకూడదని స్పష్టం చేశారు. ఇలాంటి అంశాలను వ్యక్తిగత స్థాయిలోనే పరిష్కరించాలని, పార్టీని ఇబ్బందుల్లోకి నెట్టేలా చేయవద్దని సూచించినట్లు నాదెండ్ల మనోహర్ తెలిపారు. మొత్తం మీద, పార్టీ వ్యవహారాల్లో నాయకుల నుంచి మరింత చురుకైన పాత్రను పవన్ కల్యాణ్ ఆశిస్తున్నారని ఈ సమావేశం స్పష్టంచేసింది.