గల్ఫ్ దాడుల్లో భారత నావికుల మృతి – శాంతియుత పరిష్కారం కోరిన భారత్

గల్ఫ్ ప్రాంతంలో వాణిజ్య నౌకలపై జరిగిన దాడుల్లో భారత నావికులు ప్రాణాలు కోల్పోవడం పై భారత్ తీవ్ర ఆందోళన వ్యక్తం చేసింది. హర్మూజ్ జలసంధిని సురక్షితంగా ఉంచేందుకు మార్గాలపై యూకేలో నిర్వహించిన సమావేశంలో 60కి పైగా దేశాలు పాల్గొన్నాయి. ఈ సమావేశంలో భారత విదేశాంగ శాఖ కార్యదర్శి విక్రమ్ మిస్త్రీ వర్చువల్‌గా పాల్గొన్నారు.

ఈ సందర్భంగా ఆయన మాట్లాడుతూ, ఈ దాడుల్లో నావికులను కోల్పోయిన ఏకైక దేశం భారత్ అని తెలిపారు. ఇప్పటివరకు కనీసం ముగ్గురు భారత నావికులు ఈ ప్రాంతంలో మరణించారు. ఈ ఘటనలు నావికుల భద్రతపై తీవ్రమైన ఆందోళన కలిగిస్తున్నాయని చెప్పారు.

ఈ సమస్యకు యుద్ధం కాకుండా చర్చలు మరియు దౌత్య మార్గాల ద్వారానే పరిష్కారం కనుగొనాలని భారత్ సూచించింది. అన్ని దేశాలు కలిసి శాంతిని కాపాడుతూ నావికుల ప్రాణాలను రక్షించాలని భారత్ కోరింది.