ఓటీటీలోకి వస్తున్న తెలుగు మిస్టిక్ థ్రిల్లర్ ‘పోచమ్మ’!

ఓటీటీ వేదికలపై థ్రిల్లర్ కథలకు మంచి ఆదరణ ఉంది. ఈ నేపథ్యంలో తెలుగులో మిస్టిక్ థ్రిల్లర్ కథతో ‘పోచమ్మ’ అనే కొత్త సిరీస్ రూపొందింది. ఈ సిరీస్ గ్లింప్స్ విడుదల చేసి కథలో ఉన్న ఉత్కంఠను చూపించారు. అదే సమయంలో స్ట్రీమింగ్ తేదీని కూడా ప్రకటించారు.

ఈ సిరీస్‌లో అంబటి అర్జున్ ప్రధాన పాత్రలో నటించగా, శ్రీ పూజా రెడ్డి, స్నేహా కీలక పాత్రల్లో కనిపిస్తున్నారు. శ్రుతి నాయుడు నిర్మించిన ఈ సిరీస్‌కు రమేష్ ఇంద్ర దర్శకత్వం వహించారు. ఈ నెల17 నుంచి ఆహా వేదికపై ప్రసారం కానుంది. కథలో ఉత్కంఠతో పాటు దైవ సంబంధ అంశాలు కూడా కనిపిస్తున్నాయి.

పోచమ్మ దేవత మహిమను అర్థం చేసుకోకుండా తప్పులు చేసే వారిని ఆమె ఎలా శిక్షిస్తుంది, తనను నమ్మిన వారిని ఎలా కాపాడుతుంది అనేది కథగా కనిపిస్తోంది. ఈ మిస్టిక్ థ్రిల్లర్ సిరీస్ ప్రేక్షకులను ఆకట్టుకునేలా ఉందని అనిపిస్తోంది.