అక్టోబర్ 6 నుంచి హైదరాబాద్ బస్సు ఛార్జీలు పెంపు

హైదరాబాద్‌లో బస్సు ప్రయాణికులకు మరోసారి భారం పడనుంది. అక్టోబర్ 6 నుండి తెలంగాణ రాష్ట్ర రోడ్డు రవాణా సంస్థ (TSRTC) బస్సు ఛార్జీలను పెంచింది. ఈ పెంపు ఆర్డినరీ, మెట్రో ఆర్డినరీ, మెట్రో ఎక్స్‌ప్రెస్, మెట్రో డీలక్స్ సేవలకు వర్తిస్తుంది.

కొత్త ఛార్జీల ప్రకారం:

• మొదటి మూడు దశల టికెట్లపై ₹5 పెంపు.

• నాలుగో దశ నుండి ప్రతి టికెట్‌పై ₹10 అదనంగా చెల్లించాలి.

• మెట్రో డీలక్స్ బస్సులలో మొదటి దశకు ₹5, రెండవ దశ నుంచి ₹10 పెరుగుతుంది.

ఇంధన, నిర్వహణ, ఆపరేషన్ ఖర్చులు పెరగడం వల్ల ఈ పెంపు తప్పనిసరి అయిందని టీఎస్‌ఆర్టీసీ అధికారులు తెలిపారు. అదనంగా, ప్రభుత్వం 2,800 ఎలక్ట్రిక్ బస్సులను ప్రవేశపెట్టే ప్రణాళికలో ఉంది. భవిష్యత్తులో పూర్తిగా ఇ-బస్ నెట్‌వర్క్‌ గా మారేందుకు పెద్ద మొత్తంలో నిధులు అవసరమని అధికారులు చెబుతున్నారు.అయితే ప్రజల్లో అసంతృప్తి వ్యక్తమవుతోంది. చాలామంది ఈ పెంపు మహాలక్ష్మీ పథకం (మహిళలకు ఉచిత బస్సు ప్రయాణం) కారణంగానే వచ్చిందని అంటున్నారు. ఆ పథకం వల్ల వచ్చిన నష్టాలను భర్తీ చేసేందుకు ఈ నిర్ణయం తీసుకున్నారని వారు విమర్శిస్తున్నారు.ఇది రెండు సంవత్సరాల్లో మూడోసారి ఛార్జీ పెంపు, అంతేకాకుండా బస్ పాసుల రేట్లు కూడా పెరిగాయి. ఇటీవల దసరా సెలవుల్లో ₹110 కోట్లు లాభం వచ్చినప్పటికీ ఛార్జీలు పెంచడం సరికాదని ప్రతిపక్షం విమర్శించింది.

రోజూ బస్సులో ప్రయాణించే ఉద్యోగులు, విద్యార్థులు, కార్మికులకు ఈ పెంపు ఆర్థిక భారంగా మారనుంది.