చంద్రబాబు ప్రభుత్వంపై బీసీ సంఘాల ఆగ్రహం..

చంద్రబాబు ప్రభుత్వంపై బీసీ సంఘాలు తీవ్ర ఆగ్రహం వ్యక్తం చేస్తున్నాయి. బీసీ హక్కుల సాధన లక్ష్యంగా భారత చైతన్య యువజన పార్టీ అధ్యక్షుడు బోడే రామచంద్ర యాదవ్ చేపట్టిన ఆమరణ నిరాహార దీక్ష నాలుగో రోజుకు చేరింది. ఈ నెల 11న మంగళగిరిలోని పార్టీ ప్రధాన కార్యాలయంలో ప్రారంభమైన ఈ దీక్షకు పలు బీసీ సంఘాలు మద్దతు ప్రకటించాయి. తొలి రోజున జ్యోతిరావు ఫూలే, బీపీ మండల్ వారసులు హాజరై మద్దతు తెలిపగా, రెండో రోజున మరికొన్ని బీసీ సంఘాలు మరియు రాజకీయ నేతలు కూడా సంఘీభావం తెలిపారు. మాజీ ఎంపీ విజయసాయి రెడ్డి కూడా ఇప్పటికే మద్దతు ప్రకటించగా, వంగవీటి రంగా కుమార్తె ఆశాకిరణ్ ప్రభుత్వ వైఖరిని ప్రశ్నిస్తూ దీక్షకు మద్దతు తెలిపారు.

అయితే బోడే రామచంద్ర యాదవ్ దీక్ష నాలుగో రోజుకు చేరినా రాష్ట్ర ప్రభుత్వం స్పందించకపోవడంతో రాష్ట్రవ్యాప్తంగా నిరసనలు మొదలయ్యాయి. పలు చోట్ల రాస్తారోకోలు, ధర్నాలు నిర్వహించారు. దీక్ష కొనసాగుతున్న కొద్దీ ఆయన ఆరోగ్యం క్షీణిస్తుండటంతో బీసీ సంఘాల్లో ఆందోళన వ్యక్తమవుతోంది. ఈ దీక్ష వ్యక్తిగతం కాదని, బీసీల అభ్యున్నతికోసమేనని నేతలు పేర్కొంటున్నారు. అయినప్పటికీ ప్రభుత్వం నిర్లక్ష్యం వహించడం పట్ల తీవ్ర ఆగ్రహం వ్యక్తమవుతోంది. దీక్ష స్థలికి వివిధ పార్టీల నాయకులు చేరుకుని సంఘీభావం తెలిపారు. ఆయన డిమాండ్లు న్యాయసమ్మతమైనవని, వాటి అమలు పెద్ద సమస్య కాదని, అయినా ప్రభుత్వం పట్టించుకోవడం లేదని విమర్శించారు. బీసీలకు న్యాయం జరిగేలా ప్రభుత్వం తన ఐదు ప్రధాన డిమాండ్లను అంగీకరించేవరకు దీక్ష విరమించబోనని బోడే రామచంద్ర యాదవ్ స్పష్టం చేశారు.