జియోగ్రాఫికల్ ఇన్ఫర్మేషన్ అనేది మన చరిత్ర, గుర్తింపు, సంప్రదాయం - గవర్నర్ జిష్ణు దేవ్ వర్మ!

తెలంగాణ గవర్నర్ జిష్ణు దేవ్ వర్మ హైదరాబాద్‌లోని ఎంజీబీఎస్ బస్ స్టేషన్‌లో దేశంలోనే తొలిసారిగా నిర్వహించిన “జీఐ ఆన్ వీల్స్” కార్యక్రమాన్ని ప్రారంభించారు. భౌగోళిక సూచిక (GI) అనేది మన చరిత్ర, గుర్తింపు, సంప్రదాయాలకు ప్రతీక అని పేర్కొంటూ, ఈ వినూత్న ఆలోచనను వెంటనే అమలు చేసిన రవాణా శాఖ మంత్రి పొన్నం ప్రభాకర్‌ను ఆయన అభినందించారు. సమాజం ఫోన్లు లేదా ఇంటర్నెట్‌లో కాకుండా సంస్కృతిలో ముడిపడి ఉందని, ఇటువంటి కార్యక్రమాలు ప్రజలను తమ మూలాలకు మరింత దగ్గర చేస్తాయని గవర్నర్ తెలిపారు.

టీజీఎస్ఆర్టీసీ రూపొందించిన ప్రత్యేక బస్సులపై తెలంగాణకు చెందిన జీఐ గుర్తింపు పొందిన సాంప్రదాయ కళలు, చేతిపనులు కళాత్మకంగా ప్రతిబింబించబడ్డాయి. ఆరు జిల్లాలకు చెందిన ఆరు జీఐ కళా రూపాలతో ఆరు ఎక్స్‌ప్రెస్ బస్సులను గవర్నర్ జెండా ఊపి ప్రారంభించారు. ఈ కార్యక్రమంలో రవాణా శాఖ మంత్రి పొన్నం ప్రభాకర్, ఆర్టీసీ ఎండీ నాగిరెడ్డి, హైదరాబాద్ జిల్లా కలెక్టర్ దాసరి హరిచందనతో పాటు అధికారులు పాల్గొన్నారు. ఈ బస్సులు జీఐ ట్యాగ్‌లపై ప్రజల్లో అవగాహన పెంచడంతో పాటు పర్యాటక రంగ అభివృద్ధికి దోహదం చేయనున్నాయి.

మంత్రి పొన్నం ప్రభాకర్ మాట్లాడుతూ, గవర్నర్ సూచనల మేరకు ఈ కార్యక్రమాన్ని ఆర్టీసీ కార్యరూపంలోకి తీసుకువచ్చిందన్నారు. పోచంపల్లి ఇక్కత్, వరంగల్ తివాచీలు, కరీంనగర్ సిల్వర్ ఫిలిగ్రి, నారాయణపేట చీరలు, చేర్యాల స్క్రోల్ పెయింటింగ్, నిర్మల్ పెయింటింగ్ వంటి జీఐ కళలను బస్సులపై ప్రతిబింబించారు. “జీఐ ఆన్ వీల్స్” కేవలం అలంకరణ మాత్రమే కాకుండా సంస్కృతి, సంప్రదాయం, కళాకారుల ప్రతిభను దేశానికి పరిచయం చేసే చలించే వేదికగా నిలుస్తుందని ఆయన పేర్కొన్నారు. దీని ద్వారా కళాకారులకు ఉపాధి అవకాశాలు పెరిగి, పర్యాటక రంగానికి ఊతం లభించి, రాష్ట్ర ప్రతిష్ట మరింత పెరుగుతుందని తెలిపారు.